البارحـه بيـن السـهـر والتفاكـيـر
فكـر يقفـي بـي وفكـر يجـي لـي
تزاحمـت عنـدي جيـوش وطوابيـر
مثايـل فـي بدعهـا تستـوي لــي
هـذا وأنـا شاعـر وعنـدي جماهيـر
وأتعب علـى نظـم الكـلام الجزيلـي
أنقـش علـى صدرالخيـال التعابـيـر
وأصّـور الواقـع مـن أفكـار جيلـي
عن شعر بعض الخلق ذودي مصاديـر
مــا يــاردن إلا غزيرالمسـيـلـي
عن الهماج أبعدت دلـوي عـن البيـر
الطيبـه لـي والرديـه ماهـي لــي
مكانـتـي قــدام بـيـن الطوابـيـر
ما امشي ورى الهزلا ولا ارضى الهزيلي
أسوقـهـا دام الـنـوايـا مغـاتـيـر
وأشرف على المرقاب وأرقى الطويلـي
قصيـدتـي لاقلـتـهـا للمنـاعـيـر
كـل غـدى مـن برقهـا يستخيـلـي
مثل المـزون اللـي مطرهـا شخاتيـر
تزهر بها فيـاض الخفـوق المحيلـي
ينبت بهـا عشـب المشاعـر نواويـر
لـو درت ماتلقـى لنبـتـه مثيـلـي
تعجـب معانيهـا الوجيـه المسافيـر
وإلاّ ردي الــراي ماينتـمـي لــي
مشهور لو مانـي بضمـن المشاهيـر
اللي لهـم فـي كـل مجلـس عميلـي
ناس على الشهـره تسـوق الدنانيـر
لوجيههم في كـل شاشـه (موديلـي)
مانـي بمنهـم لـو ملكـت القناطيـر
كرامتـي فـوق السحـاب المخيـلـي
أكفخ على العليـا مثـل كفخـة الطيـر
وأشـرب مـن زلال الشعورالنبيـلـي
شاعـر وأصـوّر بالقوافـي تصاويـر
والشعـر ماهـو بالنهايـه حصيـلـي
حصيلتـي حـب الرجـال المغـاويـر
اللـي ليـا مـال الزمـن ماتميـلـي
ناس علـى الفزعـه سيـوف بواتيـر
لاجيتهـم تدلـه لـو إنــك عليـلـي
حجّانهـم تضحـك وصفـر مباهـيـر
بـن ٍ وعـود وزعـفـران ٍ وهيـلـي
منهاجهـم حشمـه وشيمـه وتقديـر
فـي ظلـهـم ماللهدايــف مقيـلـي
هذاهـدف بالـي ومالـي هـدف غيـر
دونتـه بنظمـي وخـتـم الجميـلـي