|
رد: لازم ردوود اليوم بايييز الله يخليكم
انا رسلت لي الأخت احساس 31
رسالة خاصة وشرحت لها مكان المبنى
بكتبه اهني مرة ثانية عاد انا مو دليلة بس هذا الي قدرت عليه 
انتي اول ماتوصلين للجامعة
طبعاً مايحتاج اقول لج جامعة الملك فيصل كبيييييرة كبييييرة
وفيها مدن جامعية
طبعاً مكتوب عند كل بوابة شنو داخلها
بتلقين مكتوب على مكان قسم التصميم الداخلي
وعلى بوابة سكن الطالبات
في بوابة شكلها بوابة رئيسية
مو مكتوب عليها شي
بس مكتوب مدخل الطالبااات
بتشوفينها على يمينج وعلى يسارج بتشوفين المدينة الجامعية الي
قاعدين يبنونها بتشوفينها ارض كبيرة وحوسة فيها مبنى جديد وعمال وعفسه
المهم
دخلي البوابة الي قلت لج
طبعاً الحين احنا بعدنا بالسيارة
لمه تدخلين بتلقين مواقف
وبتلقين مبنى على اليمين ومبنى على اليسار
الي على اليسار يدخلج على كلية خدمة المجتمع فما عليج منه
تروحين الي على اليمين
اهنييييي راح تكون حياتج الدراسية كلها
تدخلين فيه
الحين ابوج ينتظرج برا
وانتي دخلي
بتلقين مثل الغرفة الي طبعاً لمسؤولات الامن والسلامة
طلعي منها
وامشي سييييده على ايدج اليمين
وبتلقين في النهاية مثل الفتحة دخلي فيها
وبتلقين جدااامج مبنى كبييير
مكتوب عليه من فوق 65
ودخلي فيه وطبعاً عمادة القبول والتسجيل في الدور الثاني يعني صعدي فوق ولفي يسار وبنهاية الممر بتلقين المكتب مفتوح
طبعاً لاتنسوون الملف الاخضر
مبنى 65 حتى وانتي بالسيارة من برا طالعي فوق وبتلقينه الرقم واضح
وروحي جهته
اتمنى اني وصفت لج عدل
ولا تخافين هناك موجودين السكيورتريه تقدرون تسألونهم لو لاقدر الله ضعتوا
وهم داخل الجامعة في مسؤولات الأمن وطالبات يدرسون صيفي
والله لو كنت ماخذة صيفي جان من عيوني وصلتج
للعمادة
بس مثل ماقلت لج الي يسأل مايضيع
وصحيح احنا توهقنا الجامعة كبيرة
بس حفظناها شبر شبر
اذا في شي مو واضح قولولي وانا ماراح اقصر
|