|
بخصوص القرار الجديد .. بعيد عن التأييد والاعتراض .. تعالوا نتفاهم شوي
[align=center]
السلام عليكم ورحمة الله وبركاته
بعد اذن الادارة
اعتذر بشدة اذا كان فتحي للموضوع مزعج
بس حبيت يكون موضوع مستقل يكون الردود فيه على كلامي بالضبط بعيد عن مواضيع الاعتراض على القرار أو تأييده
اول مرة افتح موضوع جديد وادري ان كثرة المواضيع تضايق وتسوي زحمة
بس مضطرة والله
لاني ابي فكرتي توصل لاكثر عدد ممكن من الاخوة والاخوات
ويشفع لي اني اول مرة اكتب موضوع جديد
واذا موضوعي مزعج ياليت تقفلونه بس بعد مانتناقش شوي باللي بقوله
ياناس فهموني يمكن انا فاهمة غلط
في البداية انزعجت من القرار بعدين فكرت فيه !!
لقيته مساعد لنا والله
يعني مثلا سالفة التفاعل في منتدى الحوار ...
قالوا لكم اللي يبي يشارك كان بها
مايبي هو حر .. بس اضغط على منتدى الحوار تصفح الموجود مجرد اطلاع فقط لاغير
كذا ضمنت عشر درجات
يعني بدال مانفرفر بهالمواقع واليوتيوب ساعتين خلوها ساعة فرة على منتدى حوار المواد كلها وساعة للوناسة
وربي ماعندي وقت حتى للوناسة مرات ادخل اوفلاين ماسنجر اشوف اختي
ابي اسولف معاها (ساكنة بمنطقة بعيدة) اخر مرة شفتها وجها لوجه من اكثر من سنة
ما القى وقت اسولف ماعندي الا كيفك واخبارك وبسرعة بسرعة واطلع عشان اشوف اللي وراي وما الحق بعد .gif "(154)")
ثاني شي عندنا الواجبات ... واجبين لكل مادة الترم كله ... صح؟؟
طيب فيه وقت .. الترم كله معقولة مانقدر نلقى وقت لحل اسئلة ((( بتساااعدنا ))) على المذاكرة ؟؟
وبعدين كثير طالبوا الدكاترة يحطون اسئلة تدريبية على الدروس وعلى فكرة الاختبار اخر الترم
يعني يوم لبوا رغبة الاكثرية وتبرعوا مشكورين انهم يستلمونها كواجب ويعطونا عليها درجات الحين صارت الشغلة تزعل !!!! 
اللي تشكل له المسألة ازمة و ماعنده وقت اوكي مو مشكلة..
ماشاء الله هنا الكل متعاونين ويحبون الخير ..
اللي فاضي وعنده وقت يحل ويحط الحلول بموضوع وانسخوا وارسلوا << جابت العيد :mh01:
فعلا لو مساعدتنا لبعضنا مافيها مشكلة ليش لا ؟؟؟؟
ما اظن الدكاترة يرفضون خصوصا انهم يدرون ان وضعنا مختلف عن الانتظام ومن حقنا يتساهلون معانا شوي
كذا ضمنا عشر درجات الواجبات
هذي 20 درجة ضمناها صحيح فيها تعب شوي
افضل من انها تكون ضمن اختبار الله العالم هالعشرة اسئلة اذا كل سؤال عليه درجتين اذا كان خمسين سؤال والا العشرين سؤال اذا كل سؤال بدرجة اذا كان مية سؤال بنجاوب عليهم صح والا يطيرون علينا العشرين درجة !!
اخر شي المحاضرات المباشرة هذي اللي من جد تعور القلب قاعدين تحت رحمة البلاك بورد متى ماحن علينا وفتح
من شاف عاهاته الايام اللي راحت مارجا خير من وراه
هذا اللي اذا بتعترضون عليه وتسوون مشكلة لين يلقون حل لحالته التعيسة 
والا يلغون العشر درجات اللي على المحاضرات المباشرة ويوزعون درجاتها على الواجب والاطلاع على منتدى الحوار
والا الباقي لا والله انا اشوفه ينفع اكثر من انه يضر
وربي ما افكر بأنانية بالعكس انا معاكم اذا بتعترضون اذا الاكثرية يضرهم هذا القرار والاعتراض راح يكون محل اهتمام الجامعة
بسجل معاكم اعتراضي بكل رضا رغم اني مستفيدة من القرار حتى وهو مرهق ويذبح
بس صدقوني اذا فيه تصويت بصوت معاكم ضد القرار
اما اذا ينفع ... رجااااااء فكروا فيه من كل النواحي اذا المسألة مسألة وقت وضغوط العمل والحياة ماتساعد الواحد يقدر يلقى مليون حل مثل موضوع الواجب ومساعدتنا لبعضنا هنا
والله العظيم انا مشغولة مثلكم واكثر
انا اشتغل و عندي مسؤوليات بيت وعيال
و شغالتي سافرت يعني كله على راسي
بعض الاحيان ما انام باليوم الا اربع ساعات وانواع الارهاق بس الشكوى لله
مالنا الا الصبر والتعب بس نحصل على نتيجة كلنا نتمناها ان شاء الله
اتمنى للجميع التوفيق
[/align]
|