السلام عليكم ورحمة الله وبركاته
اخواني اخواتي
هاذا موضوع لقيته في النقاش
وحبيت انقله لكم للإستفاده واتمنى الكل يفهم قبل مايعلق
وراح انقل لكم الأشياء المهمه فقط
وهي ردوود اخونا طالب جامعي منتسب
----
المحاضرات المباشرة اللي بدأت يوم أمس الإثنين بعد الساعة 8 بالليل ، كان هناك مشكلة تقنية بشأنها وهذه المشكلة ليست من مسؤولية الطلبة ، بل الخلل كان فنياً طارئاً لايتحمل الطلبة تبعاته .
وسيتم بمشيئة الله تعالى إعادة المحاضرات المباشرة للطلبة (اللي حضروها واللي ماحضروها) وسيتضح هذا الأمر في جدول المحاضرات المباشرة بإذن الله تعالى ، بحيث اللي حضر المحاضرة خذ الدرجة خلاص ، واللي ماحضرها عنده فرصة يحضرها وياخذ الدرجات ، وراح يسجلونها لكم (بحيث انك تقدر تنزلها على جهازك مثل المحاضرات العادية)وإذا نزلتها أو فتحتها فـ فالك طيب كنك حاضر، المسألة مو تحدي من الجامعة أو فخ مثل ما البعض قاعد يفكر ، أي خطأ مو من مسؤوليتك كطالب فماتتحمل تبعاته وأكيد الجامعة تشوف له حل بدون ما يحاسب عليه الطالب .
وإذا غلبت الروم وماقدرت تحضر المحاضرة لأي سبب ، نزل المحاضرة المباشرة (لأنها حتكون مسجلة) وكثر الله خيرك مايبون منك أكثر ، خذ الـ10 درجات بمجرد انك تنزل المحاضرة المباشرة .
حلينا موضوع المحاضرات المباشرة الحين ؟ أعتقد الإجابة نعم .
الخطأ كان تقني وماراح تحاسبون عليه ، وبيعيدونها لكم بإذن الله ، أو على أقل تقدير يا أخي راح يسجلونها ويحطونها لكم ، إذا نزلتها على جهازك أو فتحتها فكأنك حاضر وتاخذ درجات على كل الأحوال ، بس هذا السالفة لاتعقدونها ..
----
وأنا من الناس اللي ما علقت ولا نزلت موضوع على سالفة الدرجات إلا من بعيد لبعيد ولما أحد يسألني فقط ، لكن من حالي ماعلقت على الموضوع لأني عارف انها زوبعة طبيعية وردة فعل نتيجة عدم اعتياد الطلبة على هالموضوع وأي كلام راح ينكتب سواء سلبي أو إيجابي راح يضيع في الطوشة والأهم من كذا لأني أعطيت وعداً يملؤه التقدير والإحترام لمن يهمه الأمر بأن استجيب لرغبته في عدم إفراد موضوع خاص بهذا الشأن خاصةً مع الحماس الذي كنت أحمله مع وضد ردات فعل الكثيرين في هذا المنتدى ، فأتمنى إنه لما يقرأ هذه المشاركة مايعتبرها نكثاً للوعد بل مساهمة توضيحية لأني لم أفرد موضوعاً خاصاً يتطرق إلى تحليل موضوع توزيع الدرجات.
بس اللي أتمناه من كل طالب وطالبة قبل ما يفرغ شحنته يفكر بالسالفة ، بالأحرى يفهمها صح .
نعمة من رب العالمين وجاتنا ، تخيل معي :
مطلوب منك بس تحمل محاضراتك (وهذا الوضع اللي أصلا المفروض تسويه كطالب ماطلبوا منك زيادة بالعكس ، هم كأنهم يقولون لك : انت أول تنزل محاضراتك بدون ما ينحسب لك أي درجات، الحين بمجرد انك تنزل المحاضرات أو تشاهدها من المحاضرة التمهيدية إلى المحاضرة 14 لكل مادة بمحتواها خذ لك 10 درجات) نعمة .
بمجرد انك تحضر المحاضرات المباشرة اللي مقررة عليك لكل المواد (أو تنزلها إذا ماقدرت تحضرها) خذ لك 10 درجات . نعمة .
الواجب لكل مادة عندك واجبين ، موعدهم مفتوح إلى قبل نهاية الفصل الدراسي في أي وقت تسلمهم على البلاك بورد ، وتسأل الأستاذ كم سؤال على منتدى البلاك بورد أو تجاوب أو تناقش على البلاك بورد خذ لك 10 درجات . نعمة ، تخيل تتكلم أو تشارك على البلاك بورد وتاخذ 10 درجات .
فكروا فيها بإيجابية ولاتحطون العقدة في المنشار ، أما عاد اللي مو راضي يقتنع وغصب يبي يمشي نظام الجامعة على كيفة ويبتدي يفقد توازنه ويتكلم كلام أصلا خارج عن الموضوع ، وأنا ظروفي ، واللي تقول أنا حامل ، واللي يقول انا موظف واللي يقول مالهم حق هذا انتساب مو انتظام ..الخ
كل الطلبة هنا داخلين إنتساب لظروف ، يعني المؤيد والمعارض للقرار برضو عنده ظروف .
اللي حامل أو موظفة أو موظف أو عنده أي ظروف كانت فهذا القرار لايمس ظروفك وش دخله في ظروفك ؟
ياخي حمل محاضراتك (أنت أصلا تحملها من قبل ماتغير عليك شي ، والا يعني لازم تبيها جاهزة من السوق السوداء بـ500 ريال؟)، المحاضرات المباشرة ماتقدر تحضرها دخيل الله بس نزلها على جهازك ، واجب يعني ماعندك وقت تحل الواجب وعندك وقت تجلس على المنتدى تسب في الجامعة ؟!
جالس تنزل محاضراتك وراح يستغرق منك هالشي وقت ، استغله في انك تحل الواجب وتحطه على البلاك بورد ، انت داخل البلاك بورد داخل ، فيما اثناء المحاضرة تنزل حل واجبك وتنتهي السالفة ، وش دخل ظروف وماظروف ؟
باختصار الـ30 درجة بإذن الواحد الأحد مضمونه ، احنا في نعمة ماحصلوها حتى طلاب الإنتظام .
والشهادة لاتزال (باكلريوس انتساب) وريحوا نفسكم .
لقاء سعادة الدكتور عبدالله راح يوضح لكم ماغاب عني وعنكم بخصوص هذا الأمر .
إن أصبت فمن الله ، وإن أخطأت فمن نفسي والشيطان .
------
دليل ان 30 درجه مقدمه على طبق من ذهب لنا
ان في فرصه لين نهاية السمستر بأن حنا نحمل ونرسل ونشاهد
وناخذ ال30 كامله
---
وطبعا ذكر الأخ طالب ان المحاضرات المباشره راح ينزلونها لنا بحيث ان حنا نشوفها بعدين
وان في فرصه اذا مادخلنا هاذي ندخل ذيك
---
ولا ننسى محتوى المقرر
عليه درجات
اللي مايبيها يقدر يحملها من جهه ويحذفها من جهه
كذا نضمن ال 10 الخاصه بالمحتوى
ولا غلطانه؟؟