اهتمام وعتب
تدري انك على هالصمت لك حول عـام
مانت مجبر علـى صمتـك ولا انـت معـذور
والقصائد على صوتك طواهـا الحيـام
اسقهـا ...والله الله فالقـراح الجـهـور
سج شوفي على بيد السهـر ..لا ينـام
ودي القى لهمي فيـك ( منفـذ عبـور )
يركض الهم فـي روحـي بليـا لجـام
ماترك شبـر ماحـده علـى أنـه يثـور
جيت محتاج والحاجه ...عجاج وعسام
تغدي الصبر من قلب القـوي الصبـور!!
مالها الا أنت يا(شعري) نهار وغمـام
خل نورك مثـل سيلـك عليهـا حـدور
خلك اللي تنومـس قومتـه يـوم قـام
وان غدت بالشبور أزهل طـوال الشبـور
قال :والظل؟..قلت: الظل نصفـه ظـلام
حاول انك تضيـف لنصفـه النـور نـور
قال: بس القصيد يعيـش دور الكـلام!!
قلت: لن الصـدور تعيـش دور القبـور
ولا انا جيت.. واحساسي على مايـرام
أحمل من (العتب)كثر (اهتمـام) الغيـور
معك أمانه ليا من شفت (سرب الحمام )
شم وقل للفضاء من وين درب (الصقور)؟
وان قصر طول دربك عن بلوغ المـرام
ماصغر حلم شاعرك وحشـاك القصـور
شاعرك لـو تميـل أذواق كـل الأنـام
مايميـل بشطـر واحـد مخافـة يبـور
مازهد فيـك يـوم ان القصائـد خيـام
كيف يزهد ليا شاف القصائـد قصـور !!
وان تأملت وش تعني ( مرور الكـرام)
ماتكاثـر عليـه ان مـر هـذا المـرور
لك عليه ان ترزم له سحـاب المـلام
يجعل الخصب في وجه المشاريـه بـور
وان سمع بالقصيد يعيـش دور الكـلام
قال والحق عند النـاس صوتـه جهـور
مثل ماللجفيـر ان زاد قـدر الحسـام
مايطيـب القصيـد الا بقـدر الشـعـور
فالكلام (الحروف أسراب مثل الحمـام)
فالقصيد ( الحروف تطيـر مثـل الصقـور )