بما ان الموضوع عن الجن !!

انا حصلت معي قصة مع الجن

وكان في مزرعه مهجوره مدة 15 سنه .
كنا مجموعة من الشباب كل يوم نتعشى عند واحد اما في بيتهم او في استراحه او في مزرعه المهم جاء الدور على واحد من الشباب قال عندنا مزرعه قديمه ولا اعرف وصفها زين وبسأل ابوي عنها ونبغى نتعشى فيها بكره , بعد ما اخذ الوصف من ابوه اعطانا وصف المزرعه وكانت بعيدة من محافظتنا تقريبا ثلاثين كيلوا وكان وصفها سهل , فعزمت انا ويا اثنين من الشباب نروح للمزرعه من العصر وناخذ معنا اغراض العشاء والفرشات والعزبه ونضبط الوضع قدامهم عشان يجون الشباب ويحصلون كل شي جاهز وحنا فاضين ماعندنا شي, وصلنا المزرعه وفيها غرفتين ودكه قديمه وفيها نخل وشجر ميت وكلها غبار وصار لها 15 سنه ما احد جاها .. جينا على احد الغرف وفتحنا بابها وشبينا النار فيها لان كان الجو برا هواء وصلحنا شاهي وكنا ثلاثه بس , وهذا الكلام قبل المغرب بساعه تقريبا وكان الوضع طبيعي جدا ولم يكن في بال اي احد منا سالفه الجن .. قعدنا على جلستنا ساعه تقريبا سوالف وضحك قام واحد من العيال وطلع من الغرفه وراح يتمشى في المزرعه على رجليه وبقي احنا الثنين في الغرفه وهذا الوقت بعد غروب الشمس مباشرة ,, فجأة نسمع صاحبنا وهو يصيح وكان قد ابعد منا يعني حوالي 300 متر فرحنا نركض له وكانت رجليه ما تشيله من الخوف وكان قاعد على الارض ويصيح ويضحك ويبكي بصورة هيسترية وكان يقول : شفت جدي فلان قبل شوي !! وكان جده ميت زماااان وهو يحلف بالله ويقول والله اني شفته قبل شوي !! فنحن لم نعلم ما الذي اصابه ونحسب انه تخيل له شي واخذناه معنا وغسلنا وجهه بالماء وهدأ وكان يرتجف , ثم حاولنا انا وخويي ان ما نقوله وش فيك ولا نذكره نبيه يهدأ اكثر , في هذه اللحظات دخلت علينا سياره وكان قد اظلم الجو وصار الوقت بين المغرب الى العشاء وكان فيه هذه السياره مجموعه من الشباب جاؤونا عن طريق خوينا صاحب المزرعه يعني عازمهم على العشاء وكنا رسميين معهم يعني نعرفهم من بعييد بس فتغير جو الخوف اللي كان بينا وصرنا نسولف مع الشباب ونحاول ما نظهر لهم شي من اللي صار . طبعا اللحين حنا خارج الغرفه فارشين الفرشه جانب الغرفه ومشغلين اللمبه على السياره واحلى جلسه وسوالف , بعد لحظات جاء خوينا صاحب المزرعه وكان يمون على مجموعة الشباب اللي هو عازمهم لانهم يدرسون معه يعني وضعه معهم فرري , اول ما دخل المزرعه من عند البوابه وحنا نسمع صوت طبول واغاني اثاري ابو الشباب طربان مشغل على السامري اخر حد وقاعد يتنكس وهو يسوق الى ان وصل عندنا , وقف السياره عندنا وخلى المسجل شغال وقعد يتنكس عندنا ,, اللحين انا واخوياي الاثنين اللي من عصر وحنا بالمزرعه ما عجبنا الوضع لانا حاسين ان الوضع ماهو من صالحنا سامري وخرابيط يعني نبغى نتعشى ونمشي .. وابو الشباب صاحب المزرعه مايدري عن الوضع وكان فرحان بشوف زملاءه اللي هو عازمهم ,, المهم قعدنا جميع وسوالف واجواء طبيعيه..
اللحين الساعه تقريبا 11 بالليل ,, وفي اثناء الجلسة قام واحد من الشباب من اخوياء صاحب المزرعه وراح يبغى يقضي حاجته الله يكرمكم الرجال تأخر راح نص ساعه ما رجع قام واحد من اخوياه راح يشوفه لقاه جالس ويصيح بصوت خافت يقول افزع ويستنجد به جاه واخذه وجابه لنا وكان في حالة هيسترية , وكان لسانه معقود من الخوف في وقتها عرفنا ان الوضع غير طبيعي ,, قلنا وش فيك كان يتلعثم ومرتبك المهم هدأنها وقعدناه في الجلسة وصار وضع الجلسة غير مطمئن يعني وضع السوالف و الفله ما هو موجود والكل خايف , وكأن الوضع مهوب معجب خوينا صاحب المزرعه وحاول انه يغير الجو ويبين لنا ان الوضع عادي ولا فيه داعي للخوف وراح للسيارته وشغل السامري عشان يثبت لنا ان الوضع طبيعي .. قعد ابو الشباب يتنكس وحنا قاعدين وهو لحاله يلعب وانا اقول الله يستر وفجأة صار يلعب بحالة تشنج وطب علينا في الجلسة و فرقع الدنيا وينطط من مكان لمكان وحنا نجاول نمسكه ما قدرنا رحنا وطفينا المسجل يوم هدأ شوي بس كان متشنج يعني جسمه مشدود كله وكانت يديه متلويه ومشدود وبدأنا نقرأ عليه ونرشه بالماء ونحاول نلين يديه واصابعه لانه كانت متصلبه وقلنا خلاص ما عاد لنا قعده بالمزرعه دقيقه وحده اخذنا اغراضنا وشيلنا عفشنا وطلعنا منها ..
وهذا الموقف الوحيد اللي صار لي بحياتي مع الجن وانا احلف بالله ان هذه القصة حقيقة وصارت لي شخصيا انا التعب منسي , والله يصرف عنا شر كل من فيه شر

شفت ان الموضوع عن الجن قلت مناسب اذكر هذه القصة واسف على الاطالة

وشكرا اخت البطة على الموضوع