وصلنا عند مناهج البحث وشفنا طريقة وحدة عشان تقدري تميزيها اللي هي الترابطي العلاقي
دحين نشوف المنهج او الطريقه المسحيه:
هدا المنهج مايتدخل فيه الباحث ابدا
ماعليه غير يوصف ظاهره بشكلها الطبيعي من غير ماتكون له يد فيها
ومن غير مايتعمق فيها ومن غير مايعرف اسبابها
نستخدم المنهج المسحي لمن نبغى نعرف مدى انتشار امر معين في المجتمع زي مثلا.. التفحيط- تدخين طلاب المتوسط ,حوادث السيارت ,
ابغى اعرف هنا مدى انتشارها من غير ما اعرف اسبابها , من غير ما اتعمق فيها
مثلا:
مامدى انتشار تدخين الطلاب في المرحله المتوسطة؟؟؟
هنا ابغى اعرف بس مدى انتشاره ,, من غير ما اتطرق لاشياء تانيه
او
نوصف ظاهره على طبيعيتها
مثلا:
المشكلات الاسريه في مدارس الرياض
او
نعرف موقف الافراد من بعض الامور
زي مثلا
موقف الاباء من دمج المعاقين في المدارس العاديه
يعني لو الدكتور اعطانا مثل
ويبغانا نختار يطابق اي منهج
فاول شي نفهم المثل اللي اعطانا هو ...
هل بتنطبق عليه شروط المنهج المسحي؟
هل بيدرس وصف لظاهره ومابيتعمق فيها؟
هل الباحث في هدا المثل مابيتدخل فيها؟
اقري المثل واسألي نفسك هادي الاسئله ,, وحتعرفي الاجابه
النوع الثالث:دراسه الحاله
هادي تتفق مع الدراسات المسحيه بأنها توصف ظاهره معينه
بس بتختلف عنها ان دراسة الحاله بتتعمق في التفسير.. وبتدرسها من كل الجوانب
بتكون الدراسه هنا مكثفه ,, عكس المسحي اللي بيدرسها كظاهره من غير مايتعمق فيها ابدا
زي مثلا:
دراسه بيئة عمل في فرع بنك معين من جميع الجوانب
النوع الرابع: المنهج السببي المقارن:
هنا الباحث يبغى يعرف اثر متغير بين مجموعتين واكثر
يعني يبغى يعرف سبب المتغير هدا ( عشان كدا سمي سببي)
ويبغى يقارنه بين مجموعتين واكثر( عشان كدا سمي المقارن)
مثلا : الباحث يبغى يعرف اثر التدخين على امراض الصدر بمقارنه مابين المدخنين والغير مدخنين
سبب المتغير: التدخين واثره على امراض الصدر
المقارن: بين المدخنين والغير مدخنين
مثل تاني
الفرق في المخاوف بين تلاميذ وتلميذات المرحله الابتدائيه
المخاوف هنا هو المتغير اللي ابغى اعرفه.. كيف؟؟ بأني اقارن مجموعتين ( التلاميذ والتلميذات)
مثل تاني:
الضغوط النفسيه لدى الامهات العاملات والغير عاملات
نفس المثال اللي قبله
المتغير هنا : الضغوط النفسيه وابغى اعرفها كيف؟ عن طريق المقارنه بين مجموعتين ( الامهات العاملين والغير عاملين)
يبقى دحين النوع الخامس والاخير واللي هو المنهج التجريبي
حشحرحلك هو ان شاء الله اليوم في الليل او بكرة
بس اهم شي تعرفيه
انه كل الانواع مابيتدخل فيها الباحث ابدا ماعدا المنهج التجريبي