عليكم السلام
حياك اخوي
اتمنى اني اقدر افيدك باللي أعرف
ادراه اعمال / الدكتور .....الدوغان
شوف يا طويل العمر ، الماده تعتمد على الحفظ أكثر شي
وبرضو يلزمها فهم ، انا درستها عند دكتور كان يهتم بالفهم أكثر
واعتقد د . الدوغان راح يدرسك اياها بنفس الطريقه
بالنسبه للدكتور فـ هو أخلاقه كويسه لكن راعي غياب
واحيانا يغيب ولا يعطي الطلاب خبر ، يجيب اسئله صح وخطأ واختياري
وسؤال يعتمد على الفهم ، لكن مشكلته يدقق بالحل ، ولازم تجيب جواب نفس اللي بمخه
واعتقد مستحيل تاخذ درجه كامله على هالسؤال ، وفيه حالات عمليه يهتم فيها كثير
والدكتور مايحب أحد يتكلم بالمحاضره أو يمسك جوال ، ومن النوع اللي ماينسى ، ولو شافك تسوي كذا ممكن يخفس فيك بالمشاركه والحالات العملية
وفيه شعبه وحده لـ دكتور يحضيه ، بصراحه لو يخيروني أي دكتور أدرس عنده ابختار الثاني مع أنه يطلب بحوث كثير ويدقق فيها إلا أنه يراعي الطالب بالدرجات .
الاداره العامه / د.مراد عطياني
المادة هذي ثقيلة دم نفس "ادارة اعمال" بس بـ تفصيل أكثر وما انصحك تدرس الثنتين مع بعض !
بالنسبه للدكتور فـ هو ثاني سمستر له ، الدكتور طيب وحبوب ، بس انا جربته فالبحث العلمي ، يطلب منك بحث أو بحثين ، واختباراته صح وخطا واختياري ، لكن بالنهائي جاب سؤالين مقالي عن البحث اللي سويناه علشان يتأكد انك انت سويته .
محاسبه 2 / د. أحمد رجب
تكملة لـ محاسبه 1 ، لكن اللي يميزها انه كل سؤال مستقل عن الثاني يعني مو مثل محاسبه 1 كل سؤال مرتبط بالثاني ، فيه درس عن ورقة العمل اعتقد انه الأصعب
الدكتور طيب جداً ومتعاون ومستعد يعيد لك الشرح مره ومرتين وثلاثه لما تفهم
واسئلته حلوه ، لكن هالسمستر فيه طلاب على حد قولهم أنه ظلمهم وعطاهم أقل من حقهم ، لكن بالنسبه لي ماقصر .
رياضيات 2 / د.طاهر نور
الماده اذا كنت متخرج علمي راح تكون عليك سهله مره ، أما ادبي يبي لها مجهود ، بالنسبه للدكتور صراحه ما كنت أفهم منه ابداً ، وكان يكتب كلام كثير كل محاضره ويمسح السبوره مرتين إلى ثلاث مرات ، لكن فيه ناس كانت تفهم عليه ، واسئلته سهله ومايطلع بره الدفتر والأهم انه مايظلم
مبادى علم سياسه / د.مصطفى بخوش
قبل كل شي ، هالماده ماينفع تدرسها مع إدارة اعمال وإدارة عامة خصوصاً الثانية لانها تتطلب مجهود ، وفيها كمية حفظ كثيره ، الدكتور طيب وفاهم وعنده معلومات كبيره ، يطلب منك بحث من خلال عنوان رئيسي يعطيك اياه ، واختباراته صح وخطأ واختر ومقالي ، بصراحه الماده ماتنهضم !
وحاول تغير ولا تحط ادارة عامة وعلم سياسه بنفس السمستر ! يعني بدلها بماده أخف ، مثل مواد الدين مثلاً أو الانجليزي
احصاء 1 / د.شوقي الشربيني
المادة سهله ، اسهل من رياضيات 2 ، والدكتور يقولون انه زين ومايطلع بره الدفتر واحياناً يجيب بالأرقام لكن للأمانة انا مادرست عنده
أتمنى أكون أفدتك ولو بشي قليل
ولو فيه خطأ أو صار شي لما درست عكس اللي قلته لك
فـ أعذرني لأن يمكن بعضهم يتغيرون ، أو يغيرون أسلوبهم !