بشاير الأيام في حكمة الغيب
يا من يبشر مسهر العين بنعاس
راحت هيااال ولا مكنت المقاضيب
يااا رب عطفك لا يضيقن الأنفاس
" أخطيت" قالوا لي ..وقالول لي "مصيب"
وليت المصيب عن الخطااا..قال: لا بأس
عامين..ما أسمع للسوالف ولا جيب
لا سرني حظ..ولا مل ...عساس
عــــامين..ما بين الوعد والمناديب
لا عاذرن نفسي.. ولا لايم الناس
كن النصيحه من كبار العذاريب
لو قالها..الطيب من الراس للراس
وكن النوايا.. شرهااا له مخاليب
تجرح صدورن خيرهااا ماله قياس
ياللي حطبت أغلى الضلوع المحاديب
البرد برد العظم لو تحرق الفاس
حيااااك في بعض المواقف هو العيب
ما أنته بكاسب من ورا صمتك نحاس
للصدق كلمه..ماتبي منك ترتيب
وتموت لا قيلت على ميت احساس
طويل بالك تختصره المطاليب
وش كبر همك لا صبح الضحك مقياس
اما يخفف واقع الحال تكذيب
ولا نقف لأبواب الأحلام حراس
لو كل حاجة تنقضي بالمكاتيب
ما سالت الدمعه ولا جف قرطاس
رحابة الأعمار في زحمة الشيب
ولولا الصبر ماحدن عرف قوة الباس
ولولا القناعه..مات وجه التراحيب
ولا شفت قلبين على الود جلاس
أقصى العطش لا صرت بين المشاريب
مرهي من أصفاها بماها عن الياس
في لحظتن..فيهاا آخر أمالك تغيب
أصدق شعور.. لكل ما يعني إفلاس
والله ..لو مكن عباده عن الغيب
ما أحدن ضحك..غير المجنن من الناس