من باب خوّه تقدم الشرهه على راس الخوي=ياكبر شرهات الرجال اللي علي روس الرجال ياذيب ياللي في شواهيق المراقيب تعوي=تجر صوتك والصدى يضرب علي حيد الجبال ماهو صحيح إن اول اعلاج المصيبات الكوي=ولا صحيح إن الليال البيض من سود الليال عممتها تعميم والتعميم تدوى به دوي=خصص عن التعميم وجنيه الذهب غير الريال انت أبدوى والبدو ماتجهل لغاتك يا ابدوي=يعني ترانا مثلك أنعيّد علي شوف الهلال الشوى مايصلح طبيخ . الطبخ مايصلح شوي=معني كذا إن الجواب يصير من قدر السؤال دامك وردت العد من مبطي وترى به روي=حذراك لا تضرب دليّك بعد شربك جال جال ياذيب مبطي والعرب في سنحة البيت أتحوي=ماهي جديدة والذكي يحوى ليا جاله مجال القاع يا صنديد ياحليل قاعٍ مستوي=ماضاقت افجوج الاراضي لو نقول الدرب طال أنته كبير بموقفك والله على خلقه قوي=ولك عقل صاحي يفرق الميال عن درب العدال لولا القرى ياطير شلوى مالقيت أسم أقروي=ولولا الحمول الكايده ماعرف تقدير الجمال لك شرهةٍ من باب خوّه تلوي أذراعي لوي=ولي شرهة الخوّه عليك ولا على الخوّه جدال الخوّه اللي في دروب المرجله تضوى ضوي=وليا سرحت تسرح على طيب المواقيف الجزال يانجم خلّك فوق ماودي على الارض أتهوي=عيني تخيلك في جنوب الارض وألا فالشمال أنا خويك لاعدمتك يوم كلٍ له خوي=خوّه علي وضح النقا تثبت مواقيف الرجال