عيني عينك الخيانـه والله برافـو ياسـلام
وعذرك الشيطان ومدري أيش وبرضو آسفه
ويش أقول أشعاد باقي الطعن فالميت حرام
الله يسامح كـل قلـب ٍ يستبيـح العاطفـه
الكـرم طبـع الأكـارم واللئامـه للـئـام
والنخل ماينزرع فـوق الهضـاب الناشفـه
من لاوجود لك أنا خليت لك شـأن ومقـام
جمعت فيك اللي تناثر من سنيـن ٍ طايفـه
رتبت فيك أنسان كانت كل أجزائـه حطـام
علمتك أن العمر يجري وأنتي لسىّ واقفـه
علمتك أن العمر مرّه بأحترام وبلا أحتـرام
وأن الحظيظ اللي زمانه بالسعـاده صادفـه
علمتك أن النفس تأمـر بالأسائـه للكـرام
وقلت لك الديـن درب ومستحيـل نخالفـه
وعلمتك انك مهرة ٍ من فوقها يّشد الحـزام
وأنك أنتي عين رجل ٍ كـل شـي ٍ شايفـه
علمتك أنك عزوة اللي يضرب بحد الحسـام
وأنك أنتي كلمـة ٍ يبسـت علـى شفايفـه
علمتك أنك بير فيها خير منـزوف الغمـام
علمتك أن الدلـو ملـك ٍ لليديـن الغارفـه
علمتك أنك الضيـاع مـن البدايـه للختـام
وأنك أنتي الهدوء اللـي يجيـب العاصفـه
قد قلت لك العيب عيبك بين لحمك والعظـام
ولايجي في جلد غيـرك دم جرحـك نازفـه
سّد مأرب ماتأثر في سقوطـه أرض شـام
لكن أن الشام تبكي مـن عـذاب السالفـه
ويش أقول أشعاد باقي للسوالـف والكـلام
وكل وجه ٍ مثل وجهك قبل أشوفـه عارفـه
أعرف أن الريح تلعب بالسحابـه والحمـام
وأعرف أن الضلع ثابت بالسيـول الجارفـه
واحد بواحد ألف لأ واحد كذا هـو التمـام
وأنتي واحد ضرب ميه غيـر ميـه حاذفـه
كنت أظن أني سراجك في دحى ليل الظـلام
و كنت أظنك في غيابي كنتي فعلا ً خايفـه
وأثرك أنتي في غيابي { خط ثاني } وأزدحام
متمنقهه بطعم السوالف لآخر حـد وكايفـه
ياآنسه وين الوفـا وأي حـب وأي هيـام
ولابقى بالكـون رجـل ٍ ماعرفتـي هاتفـه
حسبك كيف كنتي مبدعـه بأسـم الغـرام
وكنتي أجمل لحن كذب وكنتي أفضل عازفه
بالخيانـه تستحقيـن الجـداره والـوسـام
لأنك أنتي فعـلا ً أنسانـه غبيـه وتالفـه