يلوح بهالسما غيم(ن) تـروّع شوفـة بروقـه
مع أنفاس المطر ترحل رياح العشـق لديـارك
تبلل بالمطر ثوبي وسـط نظـرات مسروقـه
حضنت بداخلي خوفي وأنا ملهوفــ لأخبـارك
طلبت القرب من قلبي عطيت القلب وعروقـه
على هـم انتظـاري لـك توافينـي بإعـذارك
تساءلت الدروب اللي على ممشـاك مطروقـه
سرى صمت الدروب ولا إجابات(ن) لمسيـارك
تساءلت المكان اللي حضـن آهـات منطوقـه
لقيت الحزن يصرخ به صدى هالحزن بأسوارك
تساءلت الزوايا كيـف يهجرهـا علـى روقـه
لقيت من الظلام أشباح عقب ماكانـت أنـوارك
تساءلت الزمن مره يكف الغـدر عـن ذوقـه
لقيت الغدر من شيمة زمان اليـوم بأسـرارك
تساءلت القصيد اللـي تركتـه لـي بحروقـه
يحن القاف على لحنك يلين القـاف بأفكـارك
ألا ياقلـة الحيلـة دمـع عبـرات مخنـوقـه
تحاصرني هموم الليل وانا من جملة أخطـارك
ألا ياقلـة الحيلـة خطايـا الوقـت مسبوقـه
خطايا والخطايا روح علـى يمنـاك ويسـارك
ألا ياسيَد العشاق يذوب العشـق مـن شوقـه
ويذوب من الهوى قلب(ن) عرف جنته في نارك