لا أبطيت ما قلت شيء و لا أنكتب حاجه
... جايز من أتفه سبب .. تحــرجني عيوني !!

يا هاجسي ما بقى من لــيلـــــــنا ناجه
... فيني من الشعر ما جمل لي طعوني

خذني من الناس و من الوقت و إزعاجه
... خذني وخل السهر يرتاح في جفــوني

قلبي وأعرفه تعود يخلق إبهـــــاجه
... من عزلتي لا أنجـرحت و خابت ظنوني !!

لا يا بحــر روحي اللي هيّج أمواجه
... حلمي على اللي رمـوني غدر و أخطوني

مثلي عليهم ( بعيد ) ويصعب إحــراجه
... لو يسرجون السحايب .. ما يطولوني

يا جعلهم فدوة اللي ضحكة حجاجه
... لا مرت البال ( كان الله في عوني ) !!

ما دلت الريح قلبي و أطفت سراجه
... إلا بعد ما خلى من ضحكته كـــوني !!

محتاجه أكثر .. من أكثر شيء محتاجه
... قسى عليّ ( الغياب ) وكسر غصوني!!

الأرض بعده سجن .. ودروبي سياجه
... والناس ما همها الا حالي و لوني !!

مع كل هذا ( وقفت ) لـــــ كل ما أواجه
... ما طحت و لا أذكر اللي حرك ركوني

قل يا بحر روحي اللي هيــّـج أمواجه
... حلمي على اللي رموني غدر و أخطوني