لــيــلــــة الــدُخـلــــــة..

ليلة الدخلـة تعتبر من أصعب الـليالي في حياة كل الأزواج ,

يمكن الوضع عندنا بالخليج أصعب بكثير من الدول العربية الآخرى بحكم طبيعة المجتمعات الخليجية المحافظة والمتحفظة ,

ومواقف ليلة الدخلة كثيرة ومتعددة , بعضها مضحك وبعضها مآساوي ,

ومن المواقف الطريفة .. موقف حصل لـ خالد صاحب ولد عمي , وخالد هذا ماشاءالله عليه , عليه حركات وطلعات عجيبه ,

قبل عرسه بيوم إشترى له عصفور وقفص , وحطهم في غرفة نومه ,

في يوم العرس وبعد الحفلة دخل هو وعروسته إلى شقتهم , وطبيعي يكون الوضع هناك كله توتر وإرتباك ,

وعادي العروس تبجي وعيونها مليانه دموع ويسيح الكحل ويخرب المكياج ,

وطبيعي أيضا إن الزوج ينادي عروسته وهي ما ترد عليه , لدرجة يحس إنه يكلم طوفه أو جماد ,

خالد كان مجهز للموقف هذا وحب يكسر روتين هالـليلة الصعبة عليه وعلى عروسته ,

وراح للقفص وطلع العصفور وجاء عند زوجته ومد يده لها , وكان يمثل عليها إنه يبي يعطيها العصفور ,

ولما رفعت راسها تبي تشوف العصفور , ترك خالد العصفور يفلت من إيده !!

وصار يروح ويجي وراء العصفور علشان يمسكه , والعروس ولا كأنه في شيء صاير حواليها .. مثل الصنم ,

شويء وإلا يناديها خالد ويقولها قومي ساعديني خلينا نمسك العصفور ,

أول مره ما ردت عليه , والثانيه أيضا ما ردت , وما تحركت إلا لما ناداها في المرة الثالثه ,

قامت العروس وصارت تلحق العصفور , بالبداية بكل بطء , وخالد يقدر يمسك العصفور ولكنه يبيها هي اللي تمسكه ,

ولما يقرب العصفور من ناحية العروس كانت تشد حيلها علشان تمسكه ,

وبعد 10 دقايق من الدوران وراء العصفور .. مسكت العروس العصفور وقامت تصارخ : مسكته , مسكته ,

وخالد يصفق لها وهو مستانس , مو علشان العصفور , علشان عروسته تحركت وساعدته ,

طبعا نفنوف العرس والإكليل والطرحه راحوا فيها من كثر الحركه والـلفلفة وراء العصفور ,

لما إستوعبت العروس الوضع وشافت شكلها بالمرايه , إنحرجت حييييل وتركت العصفور يطير ورجعت قعدت عـالكنبه ,

قام خالد ومسك العصفور وجاب القفص وعطى عروسته العصفور علشان تحطه في القفص ,

ولما إرتاحت العروس شويء وهدأ خوفها .. صار خالد يسولف وهي ترد عليه ,

فيه واحد ثاني سمع السالفه وحب يقلد اللي سواه خالد , ولكن مشكلة هذا إنه راع بر , ولا له في الرومانسية نفس خالد ,

وبدال ما يجيب عصفور أو حيوان أليف جاب ضب ,

ترك العصافير والكناري والكتاكيت والأرانب وما لقى إلا الضب ..

تخيلوا الموقف .. عروس داخله شقة زواجها في أول ليلة والضب يمشي في الشقة ,

يقولون إن العروس لما شافت الضب طاحت من طولها وما صحت إلا في المستشفى .