و الـسـبــب.. بـنــــــــــات ..!!




يوم أمس لعبت كورة , وهذا مو شيء جديد ,

ولكن الجديد والغريب في نفس الوقت ..

إننا لما كنا نلعب وقفت جنب الملعب سيارتين , كل سيارة فيها عائلة !!

والعائلة أقصد فيها أم مع بناتها وكم طفل صغير ,

حنا مرات نلعب ويكون فيه كم واحد يتفرج على المباراة ..

ولكن يصير عندنا جمهور نسائي!!

شيء جديد علينا بـصراحه ,

قبل لا يجون السيارتين كان اللعب حماس والنتيجة 2 / 2 , وكان فيه فنيات ومهارة ,

ولكن بعد ما إستوعب الكل إن فيه جمهور , والجمهور أغلبه بنات , تغير اللعب وصار فوضى !!

كل فريق فيه 8 لاعبين مع الحارس , وكان كل فريق مقسم نفسه , 3 دفاع و إثنين وسط وإثنين هجوم ,

ولكن بعد ما حضر جمهور " التخريب " صار كل الفريق هجوم , نسوا شيء إسمه وسط ودفاع !!

والنتيجة من 2 / 2 وصلت إلى 12 / 12 , صارت كرة يد مو كرة قدم !!!

صحيح حماس الفريقين زاد وكل واحد طلّع كل المهارات اللي يعرفها , ولكن اللعب خرب ,

كانت فيه هجمه واللي معاه كرة متحمس ومندفع ..

ولكنه شاف الكل واقف ومو معطينه وجه , ويطالعون جهة السيارتين !!

اثاري فيه طفل صغير نزل يلعب بالكرة اللي معاه ونزلت معاه أخته مدري أمه ,

توقف اللعب دقيقتين بدون تنسيق ولا تخطيط , فجأه , وإمحق فجأه ,

آخر شيء , وبعد ما تعبنا , وبعد ما إنتهت المباراة بالتعادل 20 / 20 ,

إكتشفنا إن العائلتين معاهم طفل يحب الكرة ,

وهم جايبينه علشان يتفرج على لعبنـا ويسكت من حنته ,

وإلا هم ما دروا عنا ولا عن لعبنـا , والود ودهم يروحون ويتركونا !!
.