لـيـــــــــل الفـاجـعــــــة ..

في مشاركة سابقة كنت قد وضحّت وكتبت أنني أعتبر الـليل أفضل أوقات اليوم بـالنسبة لي ,

لأنه يحمل الهدوء وعدم الإزعاج , رغم أن الأمر يتضمن بعض الفواجـع غير المتوقعه ,

ليلة البارحه سافروا إخواني وأهلي للسعودية , علشان يحضرون عرس ولد خالي اللي راح يتم إن شاءالله يوم الجمعه ,

كان المفروض أروح معاهم ولكني قعدت بالكويت علشان الدوام + بعض الإرتباطات والإلترامات الإجتماعية .

الساعه 10 تقريبـا وفي وقت كنت حاط عشاي أبي أتعشى وأنتظر تبدأ مباراة إنجلترا وغانا ,

وفجـأة ويدق تلفوني , وإلا المتصل ( المغناطيـس ) والمغناطيس نك نيم رقم أخوي نواف في تلفوني ,

والسبب أن نواف الله يصلحه ويهديه مغناطيس مشاكل , يدور المشاكل ويروح لها برجلينه , بدون قصد ولا تعمد ,

بـصراحه خفت أرد .. وإبليس قام يوسوس فيني و60 سالفه طرت على بالي , تعوذت من إبليس وأرد عليه ,

لما كلمته كان حوله إزعاج وأسمع واحد يقوله ما تدخل السعوديه لو شنو يصير , هاذي فيها فصل وتفنيش !!

قلت في نفسي يالله تستر , عسى الموضوع بسيط وما فيه مشكله كبيرة ,

وأنا أنادي يا نواف يا نواف , ونواف يكلم موظف المركز السعودي , وانا يا نواف رد أبك رد عليّ حسبي الله على إبليسك ..

بالأخير كلمني وقالي إن مركز السعوديه رفض يدخّـل خدامتنـا الأثيوبيـه اللي كانت رايحه معاهم ,

والسبب إن عليها تبليـغ وممنوعه من دخول السعودية , يعني خدامتنا طلعت سوابق .. هلا والله !!

أشوا إنها السالفه طلعت بسيطه وما كان شيء قوي لا سمح الله ..

قالي نواف نبي نرجع علشان نرجعها البيت وقلت له لا ترجعون ..

خلوها بالمركز الكويتي عند تطبيق الحريم وكملوا طريقكم وانا اجي وأخذها ..

وأقوم وأخلي العشاء وعصافير بطني توصوص من الجوع , وأشغل سيارتي وأروح وأجيبهـا ,

وما رجعت البيت إلا قريب الساعه 2 الفجر ,

لأن المركز كان مركز السالمي ويبعد من بيتنا 150 كيلو , يعني 300 كيلو رايح جاي .

والحمدلله الله ستر بالطريق , لأنه كان مليان شاحنات .