في مثل هذا اليوم جتني اوْحيده .. واللي حدث تبغي حروفٍ فرايد
واتقول : اكتب لي على اسمي قصيده .. قصيدةٍ ما مثلها من قصايد
وتفنّن ابرسمي وحسني وجيده .. وشعاد لو كثروا علي الحسايد !
قصيدتن آخر موديل وجديده .. أحر فيها هند واختي عنايد !!
واكتب بأني للحلا سيد سيده .. واكتبني ريمٍ خابها كل صايد
واطلب ولك أموال واللي تريده .. بس المهم تنشر على اشهر جرايد
واقول حاضر ابشري يا سعيده .. واخذي من حروفي علومٍ سدايد
تراك منتي يا فلانه وحيده .. قبلك طلبني حور كثر وعدايد
المال سوّا خلق آدم عبيده .. لكن انا ماني على هالعوايد
ما غير ابكتب شعري لاحلى فريده .. ما بكتب إلا للي بالزين كايد
ما غير شيخه والحلا هي تصيده .. ماغير شيخه لو بغى الريم قايد
وليدةٍ للحسن وصارت عميده .. لو هي حلاها افـ بنك حقّق فوايد
شيخه ومن فيها المفاتن عديده .. شيخه وتزهي لبس أحلى القلايد
درّة حسن قمره وتوها وليده .. لو شافها الصايم يصبّح يعايد
يضيف فيها الزين طبع العنيده .. عجايب الدنيا لها اليوم رايد
والشين ويّاها ضديد وضديده .. شوفي حلاها ايزيد بين الضدايد
من حبّها يجري افدمي وافوريده .. من حكمها فالقلب نافذ وسايد
في شوفها غنّي يا أسعد نشيده .. وفي ظماها جر يا حزني زايد
وفي قربها تهدى عواصف شديده .. في بعدها تشتد إلا اتّزايد
في وصلها أحظى بنومه رغيده .. بفراقها بآودّعك يا الوسايد
شيخه سنع وأخلاق وابتمشي سيده .. ماهي من اللي اتلف في كل سايد
احتلّت افوادي وصارت تسيده .. من دون سيفٍ أو جيوشٍ شدايد
شيخه تطيح إلها النجوم البعيده .. كلما تأشّر للسما طاحوا وايد
بيّحت مكنوني ابقصيده مفيده .. امدعّمٍ شعري بْأدلّه وشهايد
فقط لشيخه بكتب أحلى قصيده .. متأنقّه بازهى المعاني الفرايد
.