عـــرس الإحــــراجــــــــات ..

الحمدلله رحت للسعودية وحضرت العرس ورجعت للكويت ,

والشكر لله الذي يسر لنـا الأمور والأسباب , وحفظنا في سفرنـا وأعادنا سالمين ,

أمس الجو كان عجيييييب ونايس حيييييل ,

كنا متوقعين حر , ولكن الله رحمنا في غيوم حجبت أشعة الشمس إلين وصلنا للحفر ,

مدري شلون أوصف العرس !!

حفلات العرس الخاصة بالرجال تكون متشابهه بشكل كبير , والإختلافات بسيطة ومحدودة جدا ,

مو مثل اللي نسمعه في حفلات عرس الحريم من حركات , وتقليعات , أقرب ما تكون للخيال أحيانا ..!!

في العرس أغلبنا سواء رجال أو حريم يمشي ويسلم , والسلام هذا قد يجلب الإحراج , وأنت ونصيبك ..

عندي مشكلة مزمنـه عجزت ألقى لهـا حل , وهي حفظ الأسمـاء ,

الشخص اللي أقابله يا أحفظ إسمه من أول مره , وإلا يبطي ما حفظت إسمه !!

الوجه أحفظه , ولو يمر عليّ بعد فترة طويلة أظل متذكره ,

ولكن الأسماء , يا ويليييييييي .. هاذي مشكلتي الكبيرة اللي دائما تحطني في مواقف إحراج كثيرة ,

البارحه أكثر من شخص سلّم عليّ , هو يسألي شلونك ؟ عساك طيب ؟

وأنا جالس أعصر مخي وأحاول أتذكر إسمه , مع إني أعرفه وأعرف وجهه ولكن بدون فايده ..!!

بعضهم يعرّف عن نفسه ويقول : أنا فلان الفلان , وهذا أبوه للجنه والله يرحم والديه ,

ولكن بعضهم يقعد يسأل شلونك ؟ شلون الإخوان ؟ ليش ما تمرونا , ويمسك خط وهو يسأل ..

وطبعا صعبه أسأله : أنت منو .. ترى ما عرفتك ؟

و كل عرس وأنتم بدون إحراجااااات .