ليتني طفل وكلن يداري دمعتي
ومحدٍ يزعلني ولا اصير زعلان
ليتني طفل واكبر همومي لعبتي
ولا يضيق صدري ولا اكون طفشان
ليتني طفل بالغصب تمشي كلمتي
واللي يباريني أنا أقول خسران
ليتني طفل ومحدٍ يقاوم رغبتي
واللي ابيه يصير لو كنت غلطان
ليتني طفل دايم بوجهي ضحكتي
وأشوف كل الكون أشكال وألوان
ليتني طفل آمر وأنا في غرفتي
وأشوف كل الكون حاضر وفرحان
ليتني طفل وأمي تسمّى حجتي
تجيب لي كل شي وأنا دوم طمعان
ليتني طفل وكلن يصدق كذبتي
لان البراءه فخافقي ماسكه شان
ليتني طفل ومحدٍ يواخذ زلتي
وأمي تبدّيني على فلان وفلان
ليتني طفل وترجع خطاوي رحلتي
وماراح أزعل لو تقولون بزران