حــلـــــــــم الــقــايــلــــــــــــــة ..

صارلي كم يوم والنوم متلخبط عندي ,

إذا أبي أنام وما عندي شغل ولا إلتزامات .. ما يجيني نوم ,

وإذا عندي شغل ولازم أقوم وساعة المنبة والتلفون يرنون .. ودي أطنش كل شيء وأكمل نومي ..

غريبـه هالحاله , إذا تبي الشيء ما يجيك , وإذا ما تبيه تلقاه مرتز قدام وجهك ..!!

نومة الظهـر والقايلة ما أحبهـا , لأنها متعبة وتجيب الكسل , وبالنسبة لي مضرتها أكثر من فائدتهـا ,

مع إنها أحيانا تكون ضرورية وأمر لا بد منه ,

اليوم مثلا .. نمت الظهر و يا ليتني ما نمت ..

حلمت إن تشلسي (الفريق اللي أشجعه) يلعب مبـاراة مهمـه ,

وكان الفريق متقدم بالنتيجة وباقي ربع ساعه وتخلص المبـاراة ويفوز ,

قام المدرب ويسوي تغيير غريب جدا , وبسبب هالتغيير الفريق الثاني سجل التعادل ,

وشويء وإلا يسجلون الهدف الثاني , وتشلسي بدال ما كان متقدم صار متأخر ,

ومن زود ما كنت معصب قمت أصارخ عالمدرب , شويء وإلا يسجل الفريق الثاني هدفهم الثالث ,

وأقوم وأحذف بيالة الشاي على التلفزيون وتنكسر شاشة التلفزيون وتطفي كهرباء البيت وصارت الدنيا ظلمه ..

وأقوم من النوم ومالي خلق حق شيء , أحسب إن تشلسي خسر صج ,

وأروح للديوانية ابي أشوف التلفزيون اللي كسرته وإلا التلفزيون على حاله ,

وأروح أسأل سايقنـا الهندي .. التلفزيون هذا مسرع غيرتوه <<--- مو مستوعب لحد الحين

قالي ليش نغيره ؟ ما فيه شيء التلفزيون ,

قلت أكيد واحد من إخواني كسرت خاطره علشان خسارة تشلسي وراح وإشترى تلفزيون جديد ..

وأسألهم كلهم .. وكلهم نفس الإجابة .. التلفزيون ما صارله شيء .. ليش نغيره ونشتري جديد ؟!!

ولما شيكت في تقويم التلفـون وإلا مباراة تشلسي يوم الأربعـاء (بعد بكره) مو اليوم ..

إرتحت وما إرتحت ..

إرتحت .. علشان تشلسي ما خسر و التلفزيون ما إنكسر ,

وما إرتحت .. لأني صرت أحاتي يصدق الحلم ويخسر تشلسي وأحذف البيالة وينكسر التلفزيون !!

____ هـَــــمـْـــــسْ ______مـُـــدونــّـــات الأعــضـــــــاء______ الـحـُــــروف ْ ____

ســؤال يطرح نفسه و بقــوه ..

موظفـة رايحه دوامهـا الساعه 7 الصبح .. ليش تارسه وجههـا مكيـاج ؟!!