قالت : ترى منت بحلو قلت : رجـال
.. .. .. .. .. .. .. .. .. .. .. والزين ماهو من شروط الرجوله
الزين يلقى عنـد لبّاسـة الشـال
.. .. .. .. .. .. .. .. .. .. .. والرجل زين ان كان زانت فعوله
قالت : علامك تلبس شماغ وعقـاال
.. .. .. .. .. .. .. .. .. انت بدوي ؟ قلت : بدوي ومن حموله
ما ألبس بناطيلٍ لها الوان واشكال
.. .. .. .. .. .. .. .. .. .. .. وامتّر الشارع بعرضـه وطولـه
قالت : اجل راعـي معاميـل ودلال
.. .. .. .. .. .. .. .. .. .. .. شرب القهاوي تحسبونه بطولـه
كيفي يابنت الحضر دله وفنجـال
.. .. .. .. .. .. .. .. .. .. .. وحليب خلفـه بالمِـراح معقولـه
وحب الكرم والجود وعلوم الابطال
.. .. .. .. .. .. .. .. .. .. .. مغروس فينا من زمان الطفولـه
قالت : ترى بنت البدو حظها مـال
.. .. .. .. .. .. .. .. .. .. .. قلت : احذري حذرا تكوني جهولـه
بنت البدو يابنت مضرب للامثـال
.. .. .. .. .. .. .. .. .. .. .. فوق الجمال وطاعة الله خجولـه
ماحطّت اصباغٍ ولا حطـت إظـلال
.. .. .. .. .. .. .. .. .. .. .. ولا سيّرت بالسوق سير مهبولـه
هي مهرةٍ تصعب على كل خيـال
.. .. .. .. .. .. .. .. .. .. .. وانتي ومثلك عسفهن بالسهولـه
قالت : تغزل بي وشف حبّة الخـال
.. .. .. .. .. .. .. .. .. .. .. ناظر عيوني والرموش الكسولـه
قلت : العفو مايجتمع حـب وهبـال
.. .. .. .. .. .. .. .. .. .. .. .. ولـ كـل ذوقٍ فالمزاييـن جـولـه
قلتي : وقلت : وكلمة الصدق تنقال ؟
.. .. .. .. .. .. .. .. .. .. .. الزين ماهو من شروط الرجولـه