ســــوالــــــــــــــف أمــــــــــــــــــــــي ..

من رجعت أمي من سفرتها الأخيرة للسعودية علشان العرس , ما جلست معاها إلا في دقائق بسيطه ,

حتى قهوة بعد المغرب ما قدرت أشربها معاها مثل قبل ..!!

ماشاءالله حريم جيرانـا مساييرهم ما تخلص , كل يوم وحده شايله مطـّـاراتها وجايه عندنا ,

ولما أدخل المطبخ ألقى حلا , وفطاير , وكيك , وخير ماشاءالله تبارك الرحمـن ,

صج الحريم مسوين زحمه , ومو معطينا فرصه نشوف الوالـده ,

ولكن الواحد لما ندش المطبخ يرتاح نفسيـا , لأن الأكل جاهز ومو محتاج تحضير ,

دش وتخير اللي يعجبك من الفطاير والمعجنات , وإذا خلصت حوّل على الحلا والكيك ,

الحمدلله من أمس ومسايير الحريم قلت , لأنهم وبكل صراحه ما قصروا و قاموا بالواجب ,

صج راح نفتقد الفطاير والحلا , بس أهم شيء نقعد مع أمنـا ونشوفها ونتقهوى معاها ,

أمس قعدت مع أمي وتقهوينا وسالفه وراء سالفه إلين وصلنـا لحفلات العرس ,

من سوالف أمي عن هالحفلات إكتشفت بلاوي زرقـاء يسوونها البنات في الأعراس ..!!

عرفت إن بعض البنات إذا عرفت إن هالحرمه عندها عيال حلوين تقعد تحوم عليها طول العرس ,

وتحوم يعني تباشرها وتشوفها إذا محتاجه شيء , ناقصها شيء , تقهوت بالعرس أو لا , شربت عصير أو لا ,

وكل هذا علشان تكسب إعجاب الحرمه وتخليها تاخذ عنها فكره إنها " ذربـه و ظفـرة " ,

وتقوم الحرمه وتنعجب فيها وتخطبها حق واحد من عيالها ..!!

ومن السوالف بعد .. إن بعض البنات ما تفارق ساحة الرقـص ,

وعسى ما تغني الطقاقة أغنية إلا طبت الساحه ..!!

يقولون يا بنت الحلال الأغنية مو لج , حق بنات فلانه وبنات علانه ,

وهالحبيبه مو راده على أحد .. راقصه يعني راقصه !!

فيه سوالف ثانيـه بس مابي أتعرض للهجومات المضادة من بعض المدونـات .