الـكـولـيسـتـــرول ..

بعد شهر رمضـان اللي فات عملت تحليل دم , كنت أوسوس من السكـري ,

رحت للمستوصف وعملت التحليل وأخذت النتيجة ودخلت عـ الدكتورة المصرية , وعطيتها ورقة النتيجة ..

سألتهـا : ها يا دكتوره .. عسى ما فيه سكـر ؟!!

قالت : تطمن يا إبني السكر ميه ميه بس الكوليسترول عندك مرتفع .

قلت لها : دكتوره أنتي تتكلمين جد وإلا تضحكين .. ترى السالفه كوليتسرول مو مزح .

قالت لي : يا إبني هو أنا أعرفك علشان أضحك معاك , والله عندك كوليسترول , بص بالورقه وانت تعرف .

كلامها ما جاز لي .. أكلي أكثره سلطات وفواكه ونواشف , قليل أكل لحم , وفوق كل هذا ألعب كورة كل كم يوم ,

من وين يجيني الكوليسترول ؟؟

طلعت من عندها ورحت للغرفة اللي جنبها وكان فيها دكتور مصري , وقالي نفس الكلام ,

طلعت من المستوصف ورجعت بعد 6 ساعات , طبعا خلال هالساعات كنت في حالة نفسيه مدري شلون أوصفهـا ,

كنت أحاتي السكري وطلع لي الكوليسترول , الحمدلله على كل حال , ولكن لازم أعرف السبب علشان أفهم شنو صاير !!

دخلت على دكتور سوري توه مستلم خفارته ..

عطيته ورقة النتيجة وقالي نفس كلام الدكتورة المصرية والدكتور المصري بالضبط ,

قلت له : الله يخليك شوف الورقه عدل , يمكن فيها غلط , يمكن الحبر ساح على الرقم وعطاكم رقم كبير ,

ضحك وقعد يشرح لي كل شيء جزاه الله خير , وقالي لا تحاتي وتضخم الأمور ,

نظم أكلك ولا تاكل لحم وكثـّـر مشي ويرجع الكوليسترول معاك طبيعي بإذن الله ,

طلعت من عنده و رجعت للبيت و دخلت على قوقـل وتعرفت عـ الكوليسترول ,

قبل كنت أسمع فيه ولا أدري شنو هو , المعلومه الوحيده اللي كانت عندي إنه يسكر شرايين القلب !!

ولكن بعد ما قريت عرفت إن الكوليسترول ماده ضرورية وهامة في بناء الجسم ,

ولكن زيادة معدلها قد تسبب الآذى للإنسان ,

وعرفت إنه فيه كوليسترول ضار , وفيه كوليسترول مفيد أو نافع ,

الضـار يجي من كثرة أكل اللحوم , الحليب كامل الدسم , صفار البيض , الربيان , الجبن , الككاو , الآيس كريم ,

وكذلك الأكل المشبع بالدهون مثل الوجبات السريعه و الشبس , الشبس لحاله حكاية ثانيه يصعب شرحها !!

وأما الكوليسترول النافع فـ يجي من تناول الأسماك , الخبز ,

الفواكه والخضراوات وخصوصا الخس , لأنه يعتبر مصدر مهم ومضاد للكوليتسورل الضار .

بعد شهر .. عملت تحليل دم جديد , ولما دخلت غرفة الدكتور وإلا الدكتورة المصرية في وجهي , وأطلع بسرعه ,

ناقص بعد تخرعني وتقول الكوليتسرول كويس بس الضغط عندك مرتفع !!

دخلت الغرفة اللي جنبها وعرضت النتيجة وقالي الدكتور الحمدلله كل شيء سليم ,

قلت له شوف الكوليسترول مرتفع وإلا نازل ؟ وأكدلي إنه طبيعي ومعدله طبيعي ,

حمدت الله وشكرته وحبيت الدكتور وهو يطالعني مستغرب : مالك يا إبني .. فيه إيه ؟!!

قلت له صارلي شهر وكل يوم كوابيس من هالكوليسترول , والحمدلله توني إرتحت من همه ,

قال يا إبني نظم أكلك ولا تهمل المشي ومش حتشوف الكوليسترول ,

أهم حاجه المشي لأنه يفيدك حتى لو ما كنت مريض .