مساء الانوار 
قبل كم يوم وكالعادة
بالاستراحه ندردش
وفتحنا كم موضوع
وحبيت تكونون معي بهالسوالفٌ
من ضمن السوالف طبعا
العادات والتقاليد اللي متعارف فيها
بمجتمعنا
يعني مثلا:
زواج الاقارب
والمهر
وغيرهـ
( فلانه محجوزة لفلان )
( فلان ماله إلا هالبنت )
طبعا هذي الامور مو عند كل الناس
لانها تقريبا بدت تخف اكثر من اول
لكن لازالت بعض العوائل
تسير على هذه الطريقة.
تجي البنت للدنيا او الولد
يكون الاب
حاجزها لولد اخوه او او
قبل حتى لايكبر الطفل
وقبل لايعرف هل سيعيش ام يموت
وقبل حتى يعرف وش مصيره
بهالدنيا
هل سيكون شخص ناجح وله هدف بالحياة
ويحكم حكمه القاسي
على ابنه آو بنته.
ويحدد مصيرهـ/ مصيرها
ويكون خلاص
فلان لفلانه
من بداية الطفولة.
_ يجي واحد يخطب بنت جيرانه ..الولد ماعليه اخلاق ودين ..لكن البنت محجوزة لولد عمها
_ في يوم من الأيام شخص كان حاجز وحده من قريباته .. وطول حجزه لها يعني من يوم انهم صغار وهم يقولون فلان لفلانه وفلانه لفلان .. وبعد ما توظف تركها وقال انه مايبيها ..
ساءت الحاله بين العائلتين .. والبنت تورطت وراحت فيها حتي الخطاب مايدقون بابهم لأنهم يعرفون انها محجوزه لفلان وضاعت البنت مع ضياع هذا الحجز ..
_ بنت يتيمة وحيدة..حجزها عمها لولده ..لانه مايبغاها تطلع من العايله .. طيب ممكن البنت مو مناسبة للولد ..افكارهم غير ..شخصياتهم غير..لكن مين يسمع ..خلاص البنت محجوزة لفلان
من المذنب .في هذا كله. الشاب , الشابه , الأهل , العادات والتقاليد ؟؟
ومين اللي يحدد ويقرر ان فلان لفلانة وفلانة لفلان .. الاهل ام الشاب ام النسب ؟؟
رسول الله صلى الله عليه وسلم
قال: اذا جاءكم من ترضون دينه وخلقه فزوجوه.
وبهالعادات
لا ماعندهم عساه يطلع افشل واحد
خلاص عيب
انا عطيت كلمة مااغيرها
انتي لفلان
نصيبك كذا .
انا راح اتكلم عن رايي الشخصي
ولكل شخص حرية الرأي
انا ارفض بشدة هالعادة
وارفض بشدة اني اكون محجوز
او تكون فلانه من الناس محجوزة
من الطفولة لي.
انا يهمني الاخلاق والدين
قبل كل شي.
::::
طيب هذي عادة من العادات السيئه
تعالو فيه شغلة ثانيه
عندنا بمجتمعنا طبعا مو الكل
الشوفة الشرعية بالخطبه
بما انك لمن تخطب البنت
ماتدري شلون شكلها
الاختيار كان
يا من امك او اختك او قريباتك هم اللي
شافوها ومدحوها لكـ
وانت على وصفهم لك
وتخطب وعلى الله
يجي بعضهم يبي يطبق السنه
يوم الخطبة
يقول لأبو البنت
ابي اشوف البنت شوفة شرعية
يطالع فيه ابوها رافع حاجبه شوي
اسمع ياوليدي شوف ماعندنا شوف
تبي تكمل زواجك حياك الله .gif "(107)")
ماتبي امسك الباب
تشوفها ليله الزواج غيره مافيه
وانت اللي تحمر خدودك وتتوهق
تقول طيب طيب ياعم 
وبينك وبين نفسك تقول
حشى : اكشط واربح مثلا حظ ونصيب ههه
طيب هل ترى ان هالعادة سيئه!
ام لابد منها!
انا بتكلم عن نفسي
والله بصراحه صراحه
بزماننا هذا
ماأدري احس انه مو لازم الشوفة قبل الزواج
وكافي راي اهلك
هالوقت وكثرة الفتن ينخاف من هالبشر
وبعض الناس ماخذ الدعوة تسلية
يجيك يشوف بنات خلق الله
ويقول لامعليش والله بنتكم ماتناسبني
شعرها اصفر مثلا
ويبدأ يطلع العيوب
او انه لو مااعجبته
يطلع برى ويسولف او او
يعني من هالامور
فـ انا احتفظ بهالعاده‘ : )
:::::
عندك المهر
تقريبا تقريبا المتعارف والاغلبيه
المهر يكون بمجتمعنا 50 آلف
انا اتكلم تقريبا
عندك بعض العوائل
يأخذ الدعوة تجارة وطمع
يقولك لا
انا بنتي ازوجها بـ 100 الف او 150 الف
او 200 الف
ليه ياخوي شاري لكزس انا؟
وعندك البعض الاخر
يرضى بالقليل
طيب انتم مع القليل او الكثير؟
انا اقولكم رايي
اوكي المهر لابد منه تطبيقا للسنه
وفي وقتنا الحاضر
البنت لها احتياجاتها الخاصه من تجهيز وامور اخرى
للزواج
فـ طبيعي تأخذ من المهر
وتخلصه عليك انت يالزوج
لانها تكشخ لك وتتجهز لك وتشتري لها اغراض لك انت.
كلمة برايفت: طبعا الام تطير ربع المهر
والاب يطير ربع. ويجيك اخوها يقول تذكرين يوم عطيتك وتذكرين يوم وصلتك للسوق و و و
ويطير ربع .
يبقى لها ربع ههه.
ايوون
المهم
المبالغة بالمهر بزيادة
انا اشوفه تعنيس للبنت
وراح يبعد عنها الخطاب
ولو احد قبل هالشي
ماراح تسعد بنتك وزوجها
انت تبي لها الستر
وتبي لها حياة مريحة
تكلف على زوجها هالديون ليه!
الزوج شي طبيعي
الا من رحم ربي وورث من جده ملايين
عاد هذا خارج الحسبة
اول شي يسويه يآخذ قرض من البنك
ويعطيهم المهر ومن غير الامور الباقية
تآثيث وغيره وغيره...
ويجلس او خمس سنين مع زوجته كلها ديون
والحاله حاله.
طيب والحل!
انا اشوف انه مبلغ مثل 50 او60 مناسب
يقضي احتياجات البنت
ومقدور عليه
عاد انت مو ترخص مرة بنتك
تقول ابي لها الستر
تروح تزوجها بريال .
شوفو هالسالفه .
هذا سلمكم الله
واحد زوج بنته طلب منهم المهر ريال
المهم تزوجت البنت
مع الايامٌ
صار زوجها يتمهزأ فيها
كل شوي يقولها : ياقوطي البيبسي
كل مازعلته بشي
قال ترى انا شريتك بريال..
البنت طفشت وانفجرت من هالكلام
راحت عند اهلها
وقالت لأبوها انت ارخصتني
وزوجتني هالرجال
وصار يقول لي هالكلام
ابوها قال ماعليك انا اسنعه
المهم رفضو يرجعون البنت لزوجها
وكلمو اهل الزوج
وقالو لهم ولدكم يقول كذا وكذا
وحنا شريناكم والمقصد مو بالمهر
لكن دام هذا اسلوب ولدكم
الحين مافيه بنت
اذا يبي زوجته
يدفع 200 آلف
اهل الزوج تأسفو واقتنعو بالكلام
المهم دفعو المبلـغ
تآديبا للزوج طبعا
رجعت البنت مبسوطه مره ههه
مادرت ان زوجها اهبل ههه
مع الايام تهاوشو
قال الزوج لزوجته
تراني شاريك بـ 200 الف
يامصنع البيبسي هههههه
مالـه حل هالزوج .
المقصد من هالقصه او النكته
لاترخص البنت ولاتغليها بزيادهـ
وخير الامور الوسط
:::
تعبتكم صح
يلا حبيت أدردش معكمٌ
ويشرفني ردودكم بالتقييم حول هذه المشاركه
ويكفيني فخرأ اطلالتكم المميزه لمدونتي الصغيرهـ
والله يجعل حياتكم ميسره بكل الامور
سي يو