سولفيـنـي وان تغشّـتْـك الـدمـوع ، اتـذكّــري
يـوم كـان الحلـم نهـر .. وكانـت عيونـك هديـر
ويـوم كنـت آخـاف مـا يعجـب عيونـك مظهـري
وانحني منشـان مـا يفضحنـي الثـوب القصيـر !!
اسألـي كـل الشـوارع ، والحدايـق ، واظفـري !!
كيف كنت بكـل يـوم اهديـك ( باقـة ورد ) غيـر ؟؟
كنت اوقّف بآخر الشـارع .. واراقـب .. واحتـري ..
ليـن يهـدا الجـو .. وانتقّـى لـك الـورد النظـيـر
كل مـا امـر بْرصيـف يقـول : خلّصـت زهـري !!
وكل ما اقطف ورده .. اللي جنبها منهـا : تغيـر !!
اسألـي شباكـك الـوردي .. وش اردى بنـظـري ؟؟
لا قعـدت الـف قبـلـة بيتـكـم كـنـي غفـيـر !!
كنـت احاصـر غرفتـك بجيـوش عينـي وبـصـري
كـن لـي عـش ٍ بشباكـك وكـن العيـن طـيـر !!
آآخ .. لـو عشتـي انتظاراتـي ، وشفتـي منظـري
لا سألنـي جاركـم : وش بـك هنـيّـا تستـديـر ؟؟
و- المصيبه – دايمـاً عـذري : مضيّـع دفتـري !!
يبتسم ، ويروح – وانا مصدّق انْ عذري خطيـر !!
و ، بس يدخل .. اسمعه يضحك بصـوت ٍ مُـزدري !!
( حنّا بالعطله ، وصاحبنا على الدفتر سهيـر !! )
اسألي الجـدران .. عـن خـط ٍ عجـز لا ينقـري !!
علّـم الجـدران ( مالـم تعلـم ) فــ بـوح الضمـيـر
اسألي امـي .. عـن كـدر بالـي وضيقـة خاطـري
لا سألتنـي: يـا وليـدي وشبـك ؟؟ .. ورد الزفيـر
السـواد اللـي علـى جفونـي مـن آثـار سـهـري
لـو عرفتـي كيـف كحّلنـي بـه .. الليـل المريـر
كنت لا جـا الليـل .. قلّطتـه علـى الجفـن الطـري
ليـن نصّبنـي السهـر لعيـون خلـق الله سفيـر !!
وان نفانـي للسهـر - يـا مترفـه – حكـم قـدري
هالسهـر يـا مـا نفـى لـي مـن ضحايـاه الكثيـر
والبيـاض الـلـي تشوفيـنـه تنـامـى بشْـعـري
من مظاليمه : هـلال اعـرج ونجـم ٍ مستجيـر !!
يـا رُفـات الطيـش فـي تابـوت الاحـلام الـبـري
من خذلنـي بالبدايـه .. كيـف اصونـه بالأخيـر ؟!
ما بقـى لـك غيـر بعضـي .. واستبيحـك باكثـري
ضاع .. مثل النور لمـا ضـاع عـن عيـن الضريـر
مثل ما ضاعـت عصافيـرك عـن اغصـان شجـري
مثل ما ضـاع الامـل عـن صبـح شباكـي الصغيـر
وما بقى لك غيـر سالفتـي .. وشعـري .. وصـوري
سولفيهـن للشمـوع الحمـر .. والفـرش الوثـيـر
للستـايـر .. لـلأسـاور .. للـحـاف الـسـكّـري
للهدايــا .. للتـحـف .. للمزهـريّـه .. للسـريـر
واوعدك .. وقت الحصاد .. اتجاهل الجـوع العُـري
بس لاجل اكتب حـروف اسمـك بحبـات الشعيـر !!
ولاجـل اعـلّـم هالـزمـان المستـبـد العنـصـري
كيـف يحتـاج الغنـي لخبـزة احسـاس الفقـيـر !!