ملتقى طلاب وطالبات جامعة الملك فيصل,جامعة الدمام - عرض مشاركة واحدة - ضروري لكل المستجدآآتـ كل مايجب معرفتهـ من تجربتي

الغلا · 2009- 3- 2

هلا وغلا بكل المستجدات والله يوفقكم يارب:praying:
ترا بعدي مستجده حالي حالكم يعني الترحيب يشملني لوووول
<<تررحب بنفسها يعني:hahaha_2008: :hahaha_2008:

امممم الموضوع هذا بتكلم فيه عن الاشياء المهمه تقريبا للمستجدات الي اتذكره بقوله
والي عندها اي سؤال استفسار تسأل ان شاء الله اذا اعرف مابقصر واذا مابعرف بسأل ان شاء الله وبعد الاعضاء ان شاء الله مايقصرون
.................................................. ............................
اوووولا وقبل كل شي ابي احرصكم ع اغراضكم لاتتركونها ابد ابد ابد يعني مثلا تكرمون اذا جيتو تدخلون الحمام في بنات يخلونها عند الباب ع الطاوله او الكرسي يعني يتركونها وبعدين يرجعون مايلقونها وفي بنات يخلونها بالكفيتريا او اي مكان ويرجعون يلاقون الاغراض ناقصه او احيانا مايلقون الشنطه بكبرها

مره صديقاتي السيمستر الي فات كان عندهم محاضره وخلو شناطهم عند الباب لان المحاضره بس ساعه وطبعا طلعوا مالقوهم وكان بعدها عندنا محاضره ثانيه ولا حضروها ظلوا يدورون شناطهم الى ان لقوها تكرمون بالحمامات والاغراض مفقوده اللهي يهدي ويسامح الي سوا فيهم جذيه وربي مايجوز
المهم انتبهوا لاغراضكم تمااااااااااااااام
.................................................. .......................................
ثاني شي بنقل لكم بعض الشروط من موقع الجامعه نفسه

شروط عامة :
1. يلتزم الطالب/ة بتسديد الرسوم الدراسية حسب المواعيد التي تحددها الكلية.
2. يلتزم الطالب/ة بالمواعيد المحددة لتعديل الجداول الدراسية .
3. على كل طالب/ة الالتزام بمواعيد الحضور حسب الجدول المعتمد للبرنامج .
4. للكلية الحق فـي تغيير الجدول الدراسي .
5. للكلية الحق فـي حرمان الطالب/ة من دخول الاختبار النهائي فـي الحالات التالية :
أ ) تجاوز نسبة الغياب أكثر من 25% .
ب) عدم تسديد الرسوم الدراسية المستحقة.
6. الحالات الخاصة بتعديل الجدول الدراسي :
أ ) يجوز للطالب/ة إضافة أي مقرر فـي مدة لا تتجاوز الأسبوع الأول من الفصل الدراسي.
ب) يجوز للطالب/ة حذف مقررات سبق تسجيلها فـي مدة لا تتجاوز الأسبوع الثاني من الفصل الدراسي .
ج ) يجوز للطالب/ة الانسحاب من أي مقرر بشرط أن لا يقل عدد الساعات الدراسية المسجلة لديه/ـأ عن 9 ساعات إلى ما قبل ستة أسابيع من الاختبارات النهائية.
د ) يجب على الطالب/ة استيفاء المتطلبات السابقة عند التسجيل لأي مقرر .
7. يحرم الطالب/ة من استرداد أي من الرسوم المستحقة فـي حالة :
أ ) نهاية فترة تعديل الجداول الدراسية .
ب) الفصل التأديبي بسبب سلوك مشين أو مخل بالآداب .
ج) الرسوب أو الحرمان فـي أي مقرر دراسي .
8. يجب على الطالب/ة مراعاة ما يلي :
أ) ضرورة الالتزام بالعادات والتقاليد الإسلامية .
ب) ضرورة الالتزام بالزي الوطني .
ج) الامتناع عن التدخين داخل الحرم الجامعي .
.................................................. ....................................
وشي ثاالث نبدا من البدايه اول يوم سوو لنا اليوم التأهي
بقول لكم الي اذكره
رحبوا فينا بالبدايه وبعدين تكلموا عن الانظمه واهمية الالتزام فيها من لبس وعادات ومواعيد وطريقة الدفع والاداب يعني اللبس مثلا البلايز اي لون بس مافيها صور ولا يكون الكم قصير يعني تقريبا الى الكوع

او اقصر شوي من الكوع بس مو كثير

والتنانير اي لوون بس افضل الالوان الغامقه والطول لازم طويله واذا ميدي بس مو مره لان الي تجي بقصير مااااااتدخل يرجعونها البيت والله صديقاتي هههه كانوا يرجعونهم حتى الي لابسين تي شيرتات اكمامهم قصيره رجعوهم يعني التنوره تقريبا قصيره شوووي شوووي شوووي مو واجد ميدي كذاااب لوووول

وبعد تكلمو عن الحجاب ولازم يكون محتشم وبعد قالوا لازم تجون وتروحون مع اهلكم لووووووووول هههه امزززح بس قالوها بقط مسامير ههه واللبيب بالاشاره يفهموو ههه يعني الي بيسوون شي مني مناك ترا بندري عنهم ههههه والله من جد مدري شلون يدرون يعني والله مرتين نزلوا اعلان باسامي البنات الي سوو شي مو جين كتبوا اساميهم بس برموز يعني م.ن.ع يعني كذا وقالو تم حرمانها من الامتحان ورسوبها في الماده الفلانيه ووووو يعني عقوبات والله مو عقوبه الله يهدي الجميع :011: :011:

بعد قالوا ان شاء الله بس تطلع لج البطاقه الجامعيه طبعا وقت القبول لازم تكونين وديتي صوره لج صوره لفيسج البشوووش

الجميل

ووباول اسبوع من الدوام تطبعين جدولج من الانترنت وتودينه للقبول والتسجيل تعطينهم الجدول ويعطونج بطاقتج الجامعيه الي فيها صوورتج ((سلم تستلم)) وهذي ماتجين الجامعه بدونها ابد ومهمه يعني ماتدخلين الا فيها واذا ماجبتيها تكتبين تعهد وبالامتحانات ماتدخلين الامتحان الا فيها مررره مهمه
خلاااص عاد لاعت جبدي وانا اقول مهمه لا اشوف خششكم بدونها
:hahaha_2008: :hahaha_2008: :hahaha_2008:

بس عاد لاتجون بدونها هع هع

وبعد بعد اممممم
قالوا

**الي عندها موهبه شعر رسم القاء الخ الخ او نشاط تراجع المسؤوله عن الانشطه المكتب مقابل الشؤون الاكاديميه
**الي عندها اي مشكله او سؤال بالتسجيل او المواد تقدر تراجع المسؤوله د.فاطمه الدغيثر
**بالنسبه للمبلغ هو عباره عن 500 ريال لكل ساعه فانتي تشوفين مجموع المواد الي عندج بالسيمستر وتضربينهم ب500 ويطلع لج الناتج عموما انتي مو مضطره تسوين هالشي لانهم بيعطونج وصل بعد شهرين من السيمستر ولازم السداد ببنك الرياض بس مو بنك ثاني لا بس بنك الرياض ومكتوب بالوصل المبلغ
ولازم السداد بالمده المحدده لان الي يسدد يتأخر بيتعرض ممكن ينحرم من دخول الامتحان وماتقدرين تحطين جدول للسيمستر الثاني و و
يعني سددو بالوقت المحدد وانتو بتعرفو عن وقت السداد لما يذيعون بالمايكرفون بالجامعه وبيعلنو بكل مكان من تعليق اوراق وشاشات مختصه بعرض الاعلانات وكل جديد
**ولازم دايم تقرون الاعلانات الي موجوده بكل مكان معلقه قدام مكاتب الدكاتره وموجوده بشاشات عرض موجوده اول ماتدخلون الكليه اقروها دايما لان ممكن يعتذر دكتور عن المحاضره وماراح تعرفون الا لما تقرون الاعلان من الشاشه يعني نبهونا للاعلانات واشقد مهم تقونها داااايم
**وقالوا لنا شي عن البريد الالكتروني واستخدامه بس والله وقتها مافهمت ولاشي وللحين ما استخدمت بريدي الي ودها تعرف تقدر تسأل الشؤون الاكاديميه
**بالنسبه للجدول الي بينزل للمستجدات اول سيمستر مايحق للمستجده الا الحذف والاضافه مايحق لها والحذف لها مده محدده بحيث كل ماتتاخر ممكن تحذف الماده بس تدفع فلوسها حتى لوحذفتها نتيجة التاخير ولازم الحذف يكون بالفتره المحدده ولو حذفت من البدايه ان شاء الله انها ماراح تدفع فلوسها بس لو تاخرت بتدفع جزء من المبلغ حسب التاخير لان لو تاخرت مره تدفع المبلغ كامل ولو تاخرت كثييير ماراح تقدر تحذف لان الحذف له مده محدده فقرروا من البدايه والي تبي تحذف تراجع القبول والتسجيل بيعطوها استماره تعبيها ويتم الحذف ان شاء الله

.................................................. ...............................

**السيمستر الثاني ان شاء الله بتصير البنت هي الي تحط الجدول ولازم تنتبه لاشياء كثير وهي تحط الجدول بذكر الي اعرفه منها اما الطريقه فهي مره سسسهله

هذا كار رد مني ع بنات قالوا ليش ينزل جدول اختبارات السيمستر من البدايه

وكان ردي
(((بالعكس حبايبي لازم ينزل الجدول وهالشي لصالحكم مو ضدكم ابد من كذا ناحيه بقولكم بعضها

**تقدرون تحددون الماده الي تبون تحذفونها من الجدول لان احيانا يصادف مادتين بيوم واحد او مادتين ورا بعض يعني ممكن يكون الاوقات مو مناسبه للبنت فتحذف الماده الي تبي

**وبعد الجدول يساعدج انج تذاكرين مثلا هالماده اول باول لان مثلا بالفاينل مافي لها الا يوم كثير بنات هذا تفكيرهم وبرافو عليهم

**وبعدين السيمسترات الجايه ان شاء الله بتصرين انتي الي تحطين الجدول فممكن ان جدول الامتحانات يساعدج بانج تختارين المواد يعني مثل ماقلت انتي بتمشين اساسا بالجدول الي بتحطينه ع البروشور الي بيعطونكم اياه الي هو الدليل الي فيه مواد كل سيمستر وانتي مثلا مابتاخذين ماده لان بالاختبارات يصادف بنفس اليوم مادتين وترا كثير بنات ماينتبهون لهالشي الا بوقت الامتحانات

ان شاء الله عرفتوا ليش ضروري ينزل الجدول من بدري؟؟؟))

وان شاء الله بنزل موضوع لكيفيه تنزيل المواد وتسجيل المقررات

.................................................. ...................................
وهذا رد ع اسئله جامعيهـ

اقتباس:

كيف بالنسبه للواجبات ؟؟
الواجبات حبيبتي نفس الثانوي بالضبط كل دكتوره بتقول بنهاية المحاضره الواجب وشلون تحلينه ومتى تسلمينه
كيف نسأل الدكتور وإذا كلمناه وش يقول وش يبغى يعرف

وبالنسبه للدكتور نفس الشي انا اخذت عند دكتور كان بنهاية المحاضره يعطي واجب وببداية المحاضره الي بعدها يستلمه والواجب عموما سهل تطبيق للدرس يقيس مدى الفهم وعشان تكونين مذاكره اول باول
ومايصير نكلم الدكتور إلا بوقت المحاضره مافي برا ؟؟
لا يصير بس حنا ماكنا نحتاج نكلمه لان كنا نساله كل شي بالمحاضره وبعد دكتورنا كان في عنده ساعات مكتبيه بحيث يعطيج رقم التحويله حقته وتدقين ع رقم الجامعه وتطلبين التحويله وتكلمينه باوقات الساعات المكتبيه وفي بنات جربوا دقو بس مايرد او في خطأ بس عموما اذا بغيتي تكلمينه تقدرين اذا كنتي بالدمام تراجعين استاذه ريم الخطيب وعندها تليفون تدق لج وتكلمينه او تراجعين الاداره اذا كنتي بالحسا ويساعدونج ان شاء الله
كيف نعرف اسلوب كل دكتور يعني نكتب مانكتب هم يقولون ولا نسأل ولا شلون؟؟
لا لا الدكتور نفسه بيقو لج وش يبي وطريقته بالواجبات والمذاكره وكل شي حبيبتي واي سؤال يخص الماده تقدرين تسألين الدكتور او الدكتوره لنفس الماده
بالإمتحانات شنسووي كيف نحل ورقه وأسئله وتحتها الحل ولا حل بورقه ثانيه؟؟
لا حبيبتي كل دكتور له طريقته في الي تحلين بنفس الورقه وفي الي يعطيج مجموعة اوراق تحلين عليها غير ورقة الاسئله يعني في وفي والكل يبي الطرقه الي تريحه وكل شي سهل وحلو صدقيني

وش قالوا لو بنت إحذفت متى تصير تاخذها بعد كم ؟؟
لو البنت حذفت تاخذ الماده باي وقت تبي لكن لما الماده تنزل يعني افهمج شوفي ممكن تحذفين ماده اوكي ويجي السيمستر الي بعده وتبين الحين تاخذينها بس ماتلاقين اساسا ان هالماده نزلت من الاداره مانزلوها اذا خلااص ماتقدرين تاحذينها تنتظرين السيمستر الي بعده يمكن ينزلونها وان شاء الله تاخذينها ولو رحتي وسألتي الاداره متى بتنزل هالماده بيقولون لج ماندري لان ماتنزل من عندنا تنزل من عند المختصين مو بيد الاداره يعني

كيف بالنسبه للواجبات ؟؟
كل دكتوره لها طريقتها بالواجبات بتقولها لكم باول محاضره بتفهمكم ع اسلوبها وطريقة المذاكره وكل شي

واي شي حبايبي بالخدمه