أخوي منصور بعد التحية ..أحب أشكرك على هالموضوع واحترم رأيك ورأي الجميع فيه بس عندي تعليق بخصوص اللي صار وأتمنى تتقبل ردي أنت والأخوان جميع ..

الدكتور غلط لمـا حذف شي وجاب غيره وبنفس الوقت قال لجميع الطلاب بالمحاضرة المباشرة إن الأسئلة راح تكون من اللي عطانا اياهـا فقط وبعد ماجاات قام وشال القطعه اللي هو جابهـا بالإختبار ..!!

طيب أبسئلك الحين وحاول تكون منصف بكلامك ونبعد عن التحيز ومسألة إني أنا وأنت فاهمين اللغة الأنجليزية عشان كذا شفناهاا سهلة ولا ننسى قبل كل شي إن الناس مستويات واللغة الأنجليزية تعتبر هاجس لأي طالب سعودي ..

الحين أنت وأغلب الأخوان تقولون مهوب مجبور يحدد اصلا أو يعطينا اسئلة وكثر الله خيـره ..نقول صبر صح مو مجبور يحدد أو يسوي أو حتى لو مايبي يعطينا شي بس بنفس القوقت مهوب مجبور إنه يعطي كلمة ويقول معاكم هذي بس ويجيب غيرهـا ..

أخوي منصور معلش إحنا لو تبينا نجيبهـا من جميع الجهات ماتنفع ابداً فمسألة إنه دكتور بجامعة المفروض إن حنا نبتعد عن مسألة التلاعب بطريقة بصراحة أقرب ماتكون لهـا ساذجـة بحكم إنه يتعامل مع طلبة جامعيين ويمكن فيه طلاب وصلوا لعمره وأكبـر ..

الشي الثاني وخلنا واقعيين أكثر اخوي منصور إحنا رجـال لو نجيبهـا من هالناحية ونقول عيب إن الرجل يقول شي ولا يسويه أو يخلفه مهمـا كان العذر لأن إحنا إتفقنا من البداية إنه مو مجبور على إنه يسوي شي من الأساس ..

ويمكن عندي أهون لو مايحدد شي ولا إنه يقول شي ويجيب غيره أو يخلف فيه مهمـا كانت المبررات إحنا نتكلم عن مصداقية نتكلم عن دكتور قدوة ماترضاهـا من أحد في حياتك الشخصيه أنه يقول كلمة وغير فيهـا أو يحرف فيهـا مهما كان العذر لأن هالشي فيه نوع من الإستغفال .

أخيراً أتمنى إنك تنظر للموضوع من جميع جوانبه وإن حنا نفكر في غيرنـا من اللي معرفتهم باللغة الأنجليزية سطحية وإن حنا ماننساهم مهما كانت مهارتنـا وقدرتنا عاليه بالنسبة لهم ونأخذ الموضوع من جانب المصداقية والمكانة والقدوة اللي يحضون فيها منسوبي الجامعة ..

وأنا وضعي بالأنجليزي له الحمد والشكر فوق الممتـاز بس إن حنا نفكر بأنفسنا وبمستوانـا هذي ارفضهـا وإحنا طلاب نتشارك بكل شي ونحس بمعاناة غيرنـا اللي فقد مصداقيته في دكتور ماكان مجبور من الأساس يسوي هالكلام من قبل ولا أحد طالبه بشي فكان من الأجدر ترك حياته الشخصية بعيداَ عن عمله وواجبه وأمانته اللي مفروض مايتهاون فيهـا مهمـا كانت الأسباب ..

أتمنى ماتزعل من ردي بس هذي وجهة نظري وأتمنى تفكر باللي حولك يامنصور ولا تنظر للموضوع من جهتك وبس وتذكر كم شخص تعرفهم وكم شخص مر عليك وكيف كانت ثقافته الأنجليزيـه وهل يستحق إنه يُستغفـل من قبل قدووته الجامعية (الدكتـور ) أم لا ..؟؟

بالتوفيق للجميع وآسف للإطالة ..