السلام عليكم ورحمة الله وبركاتة
وعليكم السلام ورحمه الله وبركاته ..
تحية طيبة للجميع
اليوم وانا جالس في مكتبي واقلب في الاوارق باحثاً عن بعض المستندات ...
وجدت ملخص لشخص كان يدرس في جامعة الملك عبدالعزيز انتساب
وهذه الحادثه ربما لها 4 او 3 سنوات
انا ما احب ادخلكم في دوامات حزن في وقت الاختبارات ولكن والله حبيت اذكر لكم الموضوع من باب ان الدنيا تجتمع مع الدين والاخره في مطلب واحد
صديقي هذا كان مصاب رحمه الله بمرض عضال كانت ايامه معدوده في هذه الدنيا
قد عاش مع المرض كذا سنه ولكنه قرر خوض الانتساب والبحث عن الشهادة مثله مثل اي فرد فينا
واتذكر الحادثه اني كنت في عمره مع الاهل وانا باين احداث المأساويه ماتصير الا وانا في عمره
اتصل بي وقال اريد منك خدمة تروح للجامعة في جدة وتشوف المكاتب اللي حولها او تسئل عن المكاتب وتأتي لي بملخصات او كتب للمواد كذا وكذا وكذا
المهم رحت وجبت له الملخصات
وزرته في البيت واعطيته الملخصات كنا في وقت اختبارات او قريبه بشهر او اسابيع
المهم رحمه الله لم يكمل هذا الشهر ووافته المنيه
الله يرحمه برحمته .. ويغفر له ويوسع قبره ويجعله
رووضه من رياض الجنه ..
وبعد ما تم دفنه وتم العزاء فتره من الزمن وانا في مغسلة السيارات الا اجد ملخص وقع من باقي الملخصات ..
وخذيته معي للبيت واليوم بعد هالسنوات الاقيه
بصراحة ما انكركم القول كم هي هذه الحياة قصيره في عمر الانسان
يعني اليوم معاكم اذاكر واضحك وبكرا اكون في مكان لوحدي وانتم او بعضكم يكمل المسيره
السؤال اللي خطر في بالي وانا صادق من سوف يسئل عني في غيابي الابدي عن هذه الحياة
انا بصراحة قررت بحكم اني تذكرته وهذا تقصير مني بكرا ان شاء الله بعد صلاة الجمعة اتبرع له وللمسلمين الاحياء والاموات بمبلغ مالي
واتبرع بمال خاص عني وعن ذريتي الاحياء والاموات
يا أخوي الله يجزااك الجنه .. أنا أقدر معروووفك .. بارك الله فيك ..
بس عندي لك نصيحه يعطيك العافيه .. أتمنى أنك ماتسيء فهمي ..
بس للأفضل لك و غيرك أنك إذا نويــــت تسووي شيء
لوجه الله ثم لـــ صديقك ( الله يرحمه ) ..
أتمنى أنك ما تقووول أحد أبداا بس يكون بينك وبين رب العبااد ..
علشان تحس أنك فعلاً سويت حلووو و أجر بإذن الله في حياتك ..
يا اخوان ويا اخوات يجب علينا ان لا ننسى من فقدناهم فهم في امس الحاجه الينا والى دعائنا ...
يقال الحياة جولات والموت جوله فياليت نغتنم لانفسنا الخير ولغيرنا في هذه الحياة
عليكم بشئ كما قال الرسول صلى الله عليه وسلم
القلب مضغه ان صلحت صلح باقي الجسد
عليك بالقلوب اولاً اغسولها يومياً من امراض هذه الدنيا جرد نفسك من كل كبر ونميمه وغيبه وحقد وحسد جردها فوالله نهايتنا حفره لوحدنا وحسابنا بيكون لكل فرد ماعليه وما له
اذكركم بالله اذكركم بالله اذكركم بالله لا اله الا هو وحده لا شريك له سبحانه
ولكم كل التحايا والتقدير
واعلم ان هذه القضية ليس هذا وقتها ولكن الدنيا سعه مدام العبد يسير على ارض الله
والله يوفق الجميع لما فيه خير الدنيا والاخره