السلام عليكم ورحمة الله
اليوم السماء ملبدة بالغيوم وترعد وتبرق من كل حدب وصوب
وكله بسبب الدكتور أبو حنفي الله يجزاه خير
وبصراحة يا جماعة .. الدكتور أبو حنفي ما قصر
لأن طريقة بعض الأسئلة كان لها مفتاح للحل ..
خصوصاً تحليل المعادلات ..
يعني ممكن تمسك أي حل من الخيارات وتجرب ينفع أو لا
الصحيح .. أنا جاوبت على كم سؤال بهذي الطريق .. والحمد لله صارت الإجابة صحيحة
لكن بنشرت باللوغرتيمات .. الله لا يبارك باللي اخترعهن
نرجع لموضوعنا .. فيما تروي الجدات عن التيتات << التيتات مصرية ذي
وعلى سالفة حقرة بقرة قلي عمي عد العشرة .. خصوصاً لانتشارها بين البعض من الدارسين
واللي أشوفهم يطلعون ما شاء الله بعد ربع ساعة من بداية الاختبار << مدري متأثرين بأنشتاين وإلا وش السالفة
يقولون والعهدة على الراوي << أوخس يالشرهان
إن عبارة حقرة بقرة ترجع للشعب المصري
وأن أصل العبارة هي حأرا بأرا ( يعني سوف أقرأ ) .. والباقي مثلكم عارفين اللي عمه يقول له عدي العشرة
عاد يوم سمعوا ربعنا هالكلام من المصريين .. وهم خابرين إنهم يدغفون ( هذي تبي معجم عشان تفهم ) حرف القاف
صاروا ربعنا بهم ذهانة زايدة .. فقالوا حقرة بقرة قلي عمي عد العشرة
أنا مدري وش جاب البقرة للعد
صدز أهلنا راعين تصريف
منذو مبطي << هذا مهوب أنا تراه تبع الجملة
المهم .. وسعوا صدوركم شوي بعد هالغلقة بالرياضيات
واللي عقد روس الحبال يحلها
هذا ما لدي في هذه اللحظة العصيبة .. وسلامتكم