السلام عليكم 
هذا الموضوع عن المعوقات اللي تعوق مذاكراتكم
وتحول دون وصول المعلومه للمخ
فرحت كثير اني راح اختبر عند اهلي بعد عناء التمحط
من الخفجي للحفر لنيوزي لندا ما فيه ديره وما اختبرتبها
الموهم اني رحت قطيت عفش الخدامه وتنازلت عنها بعشرة الاف ريال
واخذت غرفتها وزبركتها وشريت مكتب ولا مكتب وزير بفلوس خدامة امي 
مسوي ابي اجيب الأول على الجامعة مجتهد والله صحيح
لكن صادفتني بعض المعوقات وسوف نتطرق لها بالتفصيل
1- ام سالم
2- مشاوير الوالده( ابو ريالين ابو عشرة زيارات نجاحات زواجات خطوبه ملكه عزاء نقل عفش )
3- راعي الهايلوكس
المعوق الأول ام سالم
تعريفها
إمراة كبيرة في السن صديقة الوالده الخاصة ورفيقة دربها وتمون على البيت كله
يعني من زمان عندنا
خصائصها
كثيرة الأسئلة وكثيرة النسيان لدرجة تسأل السؤال ثلاث مرات خلال خمس دقائق
أهدافها
تجميع اكبر قدر من المعلومات وخصائص البيوت ونشرها بأكبر سرعة فائقة لتكون سباقة بالخبر
الجزيرة مباشر
المعوق الثاني مشاوير الوالده الله يحفظها
الوالده اذا ماراحت لأبو ريالين يجيها اكتئاب وتمرض جد والله
عاد انا دايم اروح معاها والله ما فيه شي بس تشتري شباصات وتوزعهن على بنات الحارة
من غير المناسبات هذي ولدها ناجح وهذي ولدها خطب وهذي ولدها توفى وهذي طاحت من الدرج وجبسوا رجلها
طبعاً ما تروح الا تاخذ معاها شي محلات الحلويات اعرفوني واحفظوا شكلي
الموهم جيت يوم الاربعاء من الاختبار وكان عندنا الخميس قضايا المادة دسمة
الا الوالده جاهزه تستنى بالحوش
قلت هلا يمه وش مجلسك بالحر قالت امش جب لي كيكية ( يعني تورتة )
ودني لإم خلف ولدها نجح وكتب لي عليها الف مبروك << ما ادري من علمها على الحركات الف مبروك
انا ام خلف ما اخبر عندها عيال جامعيين او دراسات عليا
صغار كل عيالها قلت اي صف هو قالت ما ادري بس صغير شكله بالروضة
قلت يمه انا محمد اخوي يوم نجح من المتوسط عطيته خمس ريال وعطيته كف حلاقة وقلت له لا تعودها
وهم ولدهم ناجح ابتدائي ما ادري روضة ومسوين له حفل
اجل لو تخرج من الجامعة شكلهم يذبحون له حدى شيبان الحاره
الموهم رحت غصب عني وجبت تورتة ومريت جبت معي اثنين بنقالية عشان يشيلون تورتة الوالده
وصلنا الوالده ومشاويرها لا تعد ولا تحصى كثير الله يخليها لنا ويحفظها .
المعوق الثالث
راعي الهايلوكس
ما ادري وش يحس فيه ولد البسه
اني ما قدرت اطرحه ابي اخلي الهايلكس تصرخ على رقبته
ازعجنا واقلق راحتنا دايم يفحط بالليل الصبح الفجر ما ادري متى ينام
بالله فيه سيارة تصرخ بخامس اذا عشقت خامس تصرخ وش دينه هذا اللي صنعها
كتبت المعوقات بإختصار عشان الموضوع ما يصبح ممل
اتمنى اي واحد يكتب معوقاته من باب الترفيه منذو مبطي ما ضحكنا يمكن من حرب تشرين