بسم الله الرحمن الرحيم

سلام من الله عليكم ورحمته وبركاته

اخواني واخواتي بعد التحيه والسلام

حابه اخذ رايكم بموضوع ادمى قلبي حزنا وامطر عيوني دموعا

بدخل بالموضوع على طول

انا عندي بنت ماتسمع من الولاده
والاحتمال الكبير ان يكون السبب نقص اكسجين اثناء الولاده
والاحتمال الثاني مجهول بما ان 75% من الاسباب مجهوله مثل مادرسنا

المهم
العام وبالضبط على اخر شهر 7 بالهجري سويت لها عملية زراعة قوقعه بعد مراجعات واشعه دامت حول السنه والنص او اكثر
بعد العمليه باسبوع وتقريبا في نفس اليوم اللي كنت انتظر سماع قرار خروجنا من المستشفى يجي الدكتور يقول للاسف العمليه فشلت مع العلم انه اكدلي نجاحها بعد العمليه مباشره

والسبب ان الجهاز ماتركب زين داخل الراس وانه تحرك ولازم يعيد العمليه او ان الجهاز بيبقى خربان داخل راسها طول عمرها
(معلومه عن الجهاز: قبل العمليه الدكتور قعد يتفلسف انه احدث جهاز قوقعه على الاطلاق وانه افضل ماركه وان بنتي اول وحده بالسعوديه راح تركب هالجهاز <---------- من سوء حضها المسكينه)

فغصباً عني وماعندي اي خيار ثاني وافقت
وسولها العمليه للمره الثانيه للاسف ومدة العمليه 10 ساعات مانسى ذيك الايام كانت من جد مأساه

وعلشان بنتي ضغطت على نفسي وعلى ظروفي ودخلت هالقسم تربيه خاصه وكلي امل اني اتخصص بالاعاقه السمعيه حتى اكون قريبه منها وافهم عليها وعلى اللي مثلها لان فعلا بكون حاسه فيهم قلبا وقالبا

المهم
الدكتور قعد يماطلنا كل مره نقول له متى تركب السماعه الخارجيه علشان االبنت تصير تبدا تسمع وتتكلم يقول بعد اسبوعين وبعدها شهر والايام تمشي وهو ياجل فينا

الين اليوم
ويجيني الخبر الكارثه
استغفر الله ياربي

يقول انه يبي يعيد العمليه علشان يغير الجهاز من اصله ويحط جهاز ثاني
بسبب ان الشركه طورت الجهاز الخارجي او ان الداخلي طلع فيه خراب من الصدمه مافهمت زين
المهم انه يبي يسوي العمليه للبنت للمره الثالثه وكانها دجاجه يفتح راسها ويسكره على كيفه او انها حقل تجارب للاجهزه

ليه من الاصل يجيب اجهزه مو مجربه ولا امريكا تبي تجرب على روسنا

ادري طولت عليكم لاكن رساله من ام قلبها محروق على بنتها

لو كنتم مكاني وش بتسوون وايش بيكون تصرفكم مع هالدكتور المستهتر