بالنسبة لي حصل لي موقف, قبل اذكره ابي اقول ان لي اكثر من 12 سنة عن مقاعد الدراسة, ومن زمان عن التطور (في وقتي كل شي قديم)
المهم
اول يوم امتحانات في العقيدة لقيت اسمي ودخلت القاعة وباقي 5 دقايق ويبدأ الإمتحان, وبدأ المراقب يوزع الورقة البرتقالية حقت الأجوبة اخذتها وقعدت انتظر شوي واسرح في الجدران مدري وش السالفة المهم وانا اسرح الا اشوف العالم تكتب وتحط دوائر وشغالين الشباب, انا انهبلت قعدت اقلب في الورقة ابحث عن الأسئلة, يمين يسار واقلب الورقة احكحكها بيدي يمكنها ورقتين وانا ما انتبهت (حسيت اني مستر بن)... لااا السالفة فيها شي وين الأسئلة؟؟ وانقز ارفع يدي واقول للمراقب لو سمحت (بكل وثوق) قال ايوه يا فندم تفضل (شكله ما قال يا فندم الا عشاني كبير بالعمر) المهم قلت لو سمحت بس ابي ورقة الأسئلة, قال هي جاية بالطريق, قلت الحين تبي تقنعني ان الشباب حافظين الأسئلة ويجاوبون من روسهم؟ عاد لاحظت بعضهم وده ينفجر من الضحك, واكمل بكل وثوق : يا اخي العالم قاعدة تحل ويحطون دواوير وش السالفة؟ (عاد الله يجزاه خير شرح لي الموضوع واني لازم اكتب الإسم والرقم وخلافه خلف الورقة)