قصيدة الذيب
يا أخوي بعض الخلق ما ينغزابه
ومايقطع الفرجه كثير العذاريب
لا تحتري منّه علوم ورحابه
يفشّلك ممشاه عند الأصاحيب
ما تدري إنه عند ربعه (....)
وتلقى هروجه كل أبوها تكاذيب
تجفاه روح المرجله عند بابه
حتى إيش لو أبوه عطب المضاريب
يفرح ليا شاف العرب في طلابه
ويصعب على مثله دروب الأشانيب
خلّك سنافي(ن) يعشق الصلابه
دايم وعينك صوب قمّة هل الطيب
المرجله عذرى وتبغى ذرابه
وتبغى لها قرم(ن) فعوله معاطيب
بيت المراجل غير بيت الخرابه
والطيب ماله غير ذيب(ن) ولد ذيب
أنصحك دام النصح يحسب حسابه
لا تعترض للشر وتقول ما هيب
خلّك كما قرم(ن) يشد العصابه
يسوق نفسه لجل حرش العراقيب
يارد على عد(ن) قراح(ن) شرابه
إلين يروى من قراح المشاريب
والرجل كنزه فالكرم والمهابه
ومن لا حفظها صار مثل الرعابيب
سيف المراجل نازعه من جرابه
قدم الذي ضيّع دروب المكاسيب
هذا وأنا شاعر وعندي لبابه
وشرايد القيفان عندي مناديب
لي ماقف(ن) يثلج صدور القرابه
ولي وقفة(ن) تتعب قلوب الأجانيب
ويوم الزمن يعطي حقوق الذيابه
أخذ حقك لين يسمّونك الذيب