قصيدة بيني وبين اسمي مسااافة
يقول من عاف الليال المعاسير
يوم انرمى بالذنب قبل اقترافه
يالله من همٍ يشقّ الأزارير
حتى طرد نومه وشرّد لحافه
ذي شهقة الأسحار لا زفرة عصير
الموت قدْمه والوله من خلافه
دعوىً غدت بين الهوى والمحاذير
والحكم صادر قبل يبدا اعترافه
يا رب يا عالم بكل الآسارير
بريء من حبل الهجر والتفافه
وش حيلة الشاعر من الثلث الآخير ؟
يزهم ولا أحدٍ جاوبه غير قافه
والمشكلة .. حتى الشعر عنده يحير
في وقت صار اللام يشبه لكافه
يا هجس .. ما لحقك من الجزل تقصير
دايم معي ما ذقت طعم الحسافة
لكنّ يا هجسي زمان الأعاصير
خلاني آعافك قبل لا اعافه
على الورق .. يا مدّعين الأساطير
كثافة الاقلام زادت كثافة !!
ساحة .. وغيم .. وعالم(ن) تحت تأثير
بْروق ورعود الحزِب وائتلافه
شعر(ن) بخير .. وشعر يصبح على خير
وشعرٍ تغذى عالوهَم والخرافة
ذا اليوم مدري هو أنا عاكس السير !!
والا إنّ خطي غير خطّ الصحافة !!
اللي طموحه بس وقفة وتصوير
والا مجلة عاامرة بالسخافة
واللي يشوف انّه كما عالي النير
واللي يعالج .. ما درى بإنه آفة !!
لا يحسب إنه هدّ من هدة الطير
اليا كفخ حدّه بعالي غلافه
أمير وهْم وجيت له قلت يا امير
ما ابيك تعطيني حقوق الضيافة
لكن ليا منّك لفيت الجماهير
اسأل عن غياب الشعر واعتكافه
الجو حالك لو بدا فيه تنوير
واطيب قصيدك جاير الفكر لافه
وش عاد باقي يا خوي المشاوير
من عقب جدْب القاف تزرع عجافه
يا داهنين السير .. ما يمشي السير
رجم الحصافة غير سهل العرافة
يا مشترينه بالذهب والدنانير
من وين أبلقى صرف لأجل احترافه ؟
انا رصيدي يوم اشوف الطوابير
تاقف لأجل حرفي حنين ولطافة
وانا رصيدي يوم تاج الغنادير
ترحم خفوقٍ ما درت بارتجافه
وانا رصيدي ما يكفيه تعبير
والحظ هذي طيحته وانعطافه
الشعر أنا .. لو كنت أنا ماني بخير
لا يا رجوم الفكر لا يا ضفافه
لو ما رشاشي ما اكتسى بالنواوير
ولا نسى روضه مصافح جفافه
أستأصل جذور العنا والمقادير
وأراقبه وأدراه من قبل اخافه
لو ما قصيدي ينطح الفكر ويغير
ما كان حرفي ينعرف باختلافه
جرحي .. ودمعي .. والبلا صدري البير
خلّى ابتساماتي مجرد ثقافة !!
حاولت أبين للفرح أيّ تقدير
لاكنّ بين اسمي وبيني مسااافة !!
حتاّم يا قلبي ابي منك تحرير
وأشوف معْك اللي ولا رجْل شافه
ما زعزعنّي كبر أبانات والنير
لكن تزعزعني ولا منك رافة
قيّدتني .. وانا حفيد المناعير
وحرمتني شرب الهنا وارتشافه
وكسرتني كسر ماينفعه تجبير
وفرّحت بي عاذل / وحاقد / وتافه
متى على الله تطلق القيد واسير
إلى متى زرعك ما حان انقطافه ؟
أنا تعبت أحلم بعش العصافير
وأصحى على ظلمك ويأس انتصافه
أبي أعيش الواقع بدون تغيير
أخاصمه / وأرضيه / وأنسى خلافه
ابي أشوف الفرق من واقع الغير
شف كيف عيشتهم بليّا كلافة
أصغر طموحي : أهتني حزة عصير
وأكبر طموحي : ليل ماني أخافه !!