ياحمد لوذاب قلب المهتوي حدر المحانـي
عذره أن نارالهوى تكوي القلوب العاطفيه
والهوى بعضه عذاب وبعضه الثاني تماني
وأشهد أن بعضي تهنا به وبعضي فيه كيه
ياحمد قلبي سرت بـه.. سيـدة كـل الغوانـي
جـادل(ن) بالعـز تحيـا ..مترفه..متنعميّـه
يعربيه .كن نسمهـا ريـح هيـل وزعفرانـي
والحـلا منهـا تحـلا بالتفاصيـل الحلـيّـه
رايعه كنها الأغاني. فـي كتـاب الأصفهانـي
حالمه كنها سواليـف البـدو عقـب العشيّـه
وجهها ضوح الصباح اللي غشاني وأحتوانـي
حبّته حتـى الطيـور وغنّتـه نغمـه شجيّـه
فيه فم(ن) .. زي عنقـود العنـب حالـي ودانـي
حبّته تروي الغليل وتسعـد الـروح الشقيـه
شعرها ليل(ن) سريته ..مـدري بليلـه سرانـي
ناعم(ن) زي الحريـر ومرتمـي زي المنيّـه
خصرها لامن تثّنـت وش يصيـر الخيزرانـي
مابقا باللين ليـن ..ومابقـا بالغـي ..شيّـه
ردفها نابـي.. مـدوّر... يابـري حالـي برانـي
لا مشت يرجع وراها تسحبـه ماشفـت زيّـه
ياحمد وأن كان ذنبي حـب.... وضـاح الثمانـي
مرحبا مليـون وأكثـر بالذنـوب وبالخطيّـه
رسمها حتى على الماء لاأشتهيت الماء ضماني
شفت صورتها على الماء وأرتوي من دون ميّه
من غلاها.. في هواها.. قمت أجـر القـاف دانـي
وأرسله ...ويّا النسايم ....للهواويه ....هديه
منقوووووووووووووووووووووووووووووووووووووول
بس انا اتعجبت من هالبيت شوفو خيال الشاعر وربي انه شاعر بمعنى الكلمه
رسمها حتى على الماء لاأشتهيت الماء ضماني
شفت صورتها على الماء وأرتوي من دون ميّه