|
مابين طموحي ورغبتي ومابين محاوله فاشله سابقاً الحيرة في اختيار التخصص ارجو المساعدة
بسم الله الرحمن الرحيم
السلام عليكم ورحمة الله وبركاته
اولاً سعدت بانضمامي لمنتداكم الراقي وآمل أن يوفقني الله واقوم بتحديد تخصصي وابدا بالدرسه في هذه الجامعة
وش رايكم بالمقدمه الفصحى عاد يكفي ببدأ بالعامي عشان اخذ راحتي
اعرفكم بنفسي فلانه بنت فلان
تخصصي دبلوم برمجة حاسب الي
طبعاً دخلت هالمعهد وهالتخصص عالعميان لان الاختيار صار بسرعه بعد خروجي من تجربه فاشله وهي تخصص انجليزي بجامعة الاميرة نورة عشان احطكم في الصورة رسبت بكل المواد ماعدا الثقافه الاسلاميه والعربي لا وازيدكم من الشعر بيت نجحت بمقبول فيهن
طبعاً كنت ادرس انتساب بس النظام القديم يعني مافيه تواصل بين الطلاب والدكاتره ابداً ابداً بس كنت اخذ خصوصي مع دكتورة عربية وكنت اخذ المادة بالف يعني كل ترم 7 الاف كل سنه 14 الف والنتيجه راسبه جاتني صدمه وكرهت شي اسمه دراسه حسيت اني اكبر فاشله على اني كنت اذاكر واحب هالتخصص وكنت اتمنى اني اتخرج بكالوريوس وهذا هو تخصصي لا تحسبوني رسبت يعني اني تنكه وماافهم شي بالعكس اذا احد كلمني بمستشفى بشي افهم وش يقول بس اذا جيت ارد عليه بالانجليزي تطري علي تجربتي الفاشله واسكت لين يكلمني عربي وارد عليه تعبت والله تعبت بديت استخدم اسلوب البرمجه العصبيه واني اقدر ادرس اقدر اكمل بس للحين خايفه اختار التخصص امنيتي اتخصص انجليزي بس خايفه افشل وحسيت اني مصختها مع اهلي في الجامعه 14 الف والدبلوم ب 28 الف وهالحين لو بدرس بفلوس بعد هم يقولون ادرسي بس ادرسي اي شي لا تجلسين كذا افكر ادرس ادارة اعمال لانه على كلام اللي مجربينه سهل
بعد هالقرقره اللي صدعت روسكم بها ابي مشورتكم امشي ورا رغباتي والا امشي ورا الاسهل انا دارسه دارسه ان الله ماعاقني بشر بس التخصص ضيعت سنه كله تفكير وتعبت من التفكير واذا احد تخصص انجليزي ياليت يفيدني ويعطيني نظرة عامه عن التخصص وعن درجة سهولته
واخيراً شاكره لكم قراتكم لمشكلتي لو مارديتوا علي
واسفه على قرقتي اللي قرقتها فوق
|