حـَـــــــرْفْ الــمـِــيـــــــــمْ ..

[BIMG]http://26.media.tumblr.com/tumblr_lmrs4rO9sj1qiagboo1_500.jpg[/BIMG]




أسعدني كثيرا ما وصلني من تفاعل مع مشاركة " ألف ميم هاء " ,

مع أنني إستغربت كيف ربط البعض بين الإسم و بين حرف الـ M الموجود في عنوان المدونة !!

هل غاب عن أذهانهم أن حرف الـ M هو الحرف الأول من إسم قبيلتي " المطيري " ؟!!

هل تناسوا أن حرف الـ M هو الحرف الأخير من إسمي ؟!!

عمومـا ..

لا أجد حرجا من الإعتراف أن إسم " مهـا " يتصّدر قائمة أسماء البنـات المفضلّة عندي ,

و أعترف أيضا .. إذا رزقني الله بنت راح أسمّيها بـ إسم " مهـا " ..

و يأتي بعدها إسمـا " عبيـر " & " وضحـه " ,

" عبير " .. لأن هذا الإسم غير موجود في عائلتنـا الصغيره ( عمامي و خوالي ) ,

و هو إسم ذا دلالات عاطفية جميلة و مميزة , يحسّسك أنك داخل حديقة مليئة بالورود و الزهور و العصافير ..

و أما " وضحـه " فهو إسم جدتي (أم أبوي) رحمة الله عليهم .. وهي حرمه حكيمه وعقلها يوزن ديره ,

وصل عمرها إلى 100 سنه و كانت لا تزال في وعيها و تخدم نفسها بـ نفسها , وما تحب أحد يسوي لها شيء ,

حتى لما ماتت ما تعبّت أحد , زلقت و هي تتوضى و طاحت على راسها و تنومت في العنايه يومين و بعدها توفّت ,

و المشكله أن هـ الإسمين ( عبيـر & وضحـه ) غير موجودين حتى الآن في بنات عائلتنـا !!

أغلب بناتنا اساميهن متشابهه .. نوره , نشمية , جوزاء , ميثاء , مريم .. حتى ميرفت عندنا ,

و هذا أغرب إسم بنت بالعائلة !!

الإسم هذا أصلا داش عرض .. يقولون أن ابوها اللي هو خالي كان يتفرج على مسلسل مصري ..

و إتصلوا عليه و بلغوه أنه جته بنت , و هالبنت هي آخر العنقود من عياله و بناته ,

و المسلسل اللي كان يتابعه وقتها كانت فيه وحده مزيونه إسمها ميرفت .. فقالهم سموها ميرفت ,

مدري شنو كان يحسّ فيه خالي الله يطوّل لنا بـعمره .. ترك إسم وضحه و عبير و سمّى ميرفت !!

بس الحمدلله إن المسلسل مصري ..

الله يعين البنت لو كان المسلسل مكسيكي و سماها " غوادالوبي أو إنطوانيت " !!


و أما أسماء الأولاد .. فـ يأتي إسم " خالـد " على رأس القائمـه , و بعده " عبدالله " ,

و فيه إسم لو يعطوني فلوس ما حبيته , و هو إسم " نـوّاف " !!

الإسم هذا صار بـالنسبة لي مرادف لـلإهمال و الفوضى ,

أخوي الوسطي إسمه " نـوّاف " و ولد عمي أيضا إسمه " نـوّاف " ,

و هـ الإثنين أخر إثنين في العالم يحبون الترتيب و التنظيم , حياتهم كلها فوضى في فوضى ,

و سبحان الله اللي ياخذ و يعطي .. أخذ منهم حب التنظيم و عطاهم خفة دم مو طبيعية !!

و إذا إجتمعوا في مكان واحد .. الله يعين اللي قاعدين معاهم ,

ما راح تلقون ناس يحبون المزح و الضحك و الغشمرة و المقالب و الصرقعه مثلهم ,

و ما راح تلقون ناس عندها قدرة على التقلّب و التكيّف على أي موجه مثلهم ,

مرّه يكونون بدو , وأهل مخيم و طلعات و كشتات و قنص ,

و مرّه أهل بحر و حداق و صيد سمك ,

و مرّه أهل سياكل و جنزات و اللي يشوفهم يقول هذولا أجانب !!

و مرّه أهل كشخه و رزّه و سيارات آخر موديل !!

اللي يعرفهم يحتار في أمرهم , اليوم جوّ و بكره جوّ جديد ,

حياتهم ماشيه ع البركه , لا ترتيب و لا تخطيط ..

مبدأهم بالحياه : ( رزق بكره مع بكره .. خلنا نعيش اليوم و نستانس فيه) !!

أخوي نوّاف مثلا .. سميته " كبير المهمليـن " , مهمل بشكل لا يوصف و لا يصدق !!

إهماله يرفع الضغط , و يفقع المرارة , صارلي سنوات ما أعتمد عليه ..

مو قصور فيه , هو كفؤ و قد المسؤولية , ولكنه مهمل , لازم أعصّب و أحمّق علشان يسوي اللي أطلبه منه ,

مع إن الله عطاه لسـان حلو و أسلوب إقناع عجيب , يسحر اللي قدامه بالكلام ,

قبل فترة كانت عندنا معامله حق بيتنـا و صادف ذاك اليوم إن " نـوّاف " معاي ,

المعامله وصلت عند موظفه قشرة و نفسها في خشمها , و حطتّها في الدرج و قالت لي تعال بعد إسبوع !!

حاولت أتفاهم معاها علشان تخلص المعامله و لكنها شدّت بالكلام , فـ شدّيت معاها , و هي تشّد و أنا أشدّ ,

إرتفع الصوت و دخلوا الموظفين و الموظفات علينا و دخل معاهم " نـوّاف " و طَلَعت من المكتب بدون فايده ,

بعد خمس دقايق ما دريت إلا " نـوّاف " جاي و معاه المعامله مختومه و خالصه , سألته شنو سويت ؟

قالي : " أنت ما تعرف للحريم , الحريم يبيلهم تعامل خاص و لسان حلو ..

قولها كلمتين حلوات و تخلّص معاملتك .. مو تهاوشها و تتخانق معاها " .

سألته : ما عرفت ليش حطت المعامله بالدرج مع إنها ما تبي الا ختم ؟

قالي إنه فهم منها إنها متزوجه مطيري و متهاوشه معاه و أنت شدّيت معاها بالكلام و حطّت الحرّه في المعاملة !!


" نـوّاف " .. عنده مشكلتين .. وحده كبيرة و الثانيه ضخمه ..

الكبيرة هي النـوم .. إذا نام يعني نام , الشغله الوحيده اللي ما يمزح فيها في حياته هي النوم !!

مو مهم وين ينام .. شلون ينام .. أهم شيء إنه ينام مهما كانت الظروف و الأجواء المحطيه فيه ,

و الضخمه هي الإهمـال ..

عادي عنده ينزل راتبه و يسحبه و يصرفه كلّه في يوم واحد !!

عادي يتغدّى معاي , و في الـليل يتصل عليّ من برا الكويت و يقولي تراني مسافر !!

عادي عنده يترك بوكه في السيارة و يخليها مفتوحه و كأنه يقول يا حرامي تعال إسرقني !!

عادي جدا يودّي أمي السوق و يتركها لحالها و يرجع البيت وما تطري على باله إلا بعد ساعتين !!

عادي جدا يواعدك و يدق عليك ويأكد الموعد و لما تجي تلقاه نايم أو طالع من البيت !!

و لأنه مهمـل فـ إنه يخطط و يقرر و ينفذ في دقيقه .. ما عنده وقت يفكر و يشوف الوضع يسمح أو لا ..


* /

كنت داش أكتب عن " الذكريات " و لكن الحديث عن الحروف و الأسمـاء لخبط كل شيء ..




ــــــــــــــــــــــــــــــــــــــــــــــــــ ـــــــــــــــــــــــــــــــ
هـَــمـْــــــــــــــــسْ الــــحـًـــــــــــــــــــــــــــــــرُوفْ
ــــــــــــــــــــــــــــــــــــــــــــــــــ ـــــــــــــــــــــــــــــــ



همســــــه ..


الفــراق ..

ويلـي منـك يا الفــراق ..

يا طـيـبـيـن ..

وحشتونـا يا طـيـبـيـن ..