السلام عليكم ورحمة الله بركاته
حبيت أنزل لكم موضوع أنا كاتبته فيه من الواقع وأكيد يجب إضافة الخيال أتمنى أن يعجبكم
(وغابت شمس الحق)
كنت اود في كتابتي هذه ان اكتب شي مفرح ولكن للأسف الشديد دنيانا خذلتنا لان هذه القصه حزينه ولولا وجود الفرح والحزن لماكان هناك طعم للحياه ولولا وجود الظلم والعدل لماتوازنت هذه الحياه فالله سبحانه وتعالى سخر لنا الأمور ومضاداتها حتى تسير الحياه بأفضل حال ولله الحمد والمنه ولكن كيف يكون طعم للحياه اذا كنا نرى الحق بأعينناونسكت كنت أتمنى ان تتوقف الأمور عند هذا الحد بل نتواصل في الظلم ويتكلم بعض البشر في عرض الناس وكأنهم حضرو ا الموقف!!
لن أطيل عليكم ولكن تأكدوا لن أخط قلمي لولم أتأكد من الحق وأريد أن أشارككم ماأعرفه ومن ثم تخبروني عن رأيكم..وهل أنا على صواب أم على خطأ ؟لاني بشر وقد أخطيئ وقبل ذلك اسمحوا لي لأني سأكتبها بالعاميه..
تبدأ قصة رتاج من ولادتها هي وحيدة أمهاوأبوها يعني ماإطلعوا على هالدنيا إلاعليها.."طبعافي مجتمعنا وحيدة أمها وأبوها تأخذ الدلال كله ويحق لها تصير دلوعه" كان كل شي تبيه مجاب وبماأنها الوحيده فتحب تكون مع أقاربها ومع الي بعمرها لانه مافي أحد مثل عمرها وتفكيرها وكان اقرب شي لها من أقاربها هم بنت عمتهاسوزان وبنت عمها سماهر ..وتنطبق عليهم مقولة "الأقارب عقارب"... علشان تعرفون السبب تعالوا مع كل وحده منهم وحالتهاالإجتماعيه ..
نبدأ عند سوزان حالتها في البيت الأم تعبانه الأب متزوج وحده ثانيه ولايدري عنهم لها إخوان وخوات بس كلآ ساهي في حياته الخاصه فيه يعني بإختصار البيت ساااااااااااايب كانت دايم تقول لرتاج ليش كل شي تبينه مجاب وعندك أم وأبو وانالاهذا ولاهذا كانت رتاج تبتسم وتسكت لأنها عاذرتها وماكانت تقصر على سوزان بس مايبين في عينها..ندخل ألحين على عالم سماهر لها أم وابوها مزواج يتزوج ويطلق ولايدري عنهم وهي الكبيره عندها أخوان ولد وبنت أصغر منها"في مجتمعنا الكبيره هي الي لها الثقه العمياء "بس مع فقد حنان الأب والأم صعبه تكون الثقه لان حنانه هو أهم من المال وكانت أمها توفر لها كل شي مثلآ"شرائح جوال بالهبل،بطاقات شحن،مكالمات آخر الليل وعلى طول شابكه على النت لارقيب ولاحسيب "أمها على أساس واثقه منها !!بس للثقه حدودها وهذا الي ماعرفته أمها...
تجمعوا سوزان وسماهر بس علشان يدمرون حياة رتاج بأي شكل وتنطبق عليهم مقولة."تجمع المنحوس على خايب الرجا"
كانت سوزان تسيير عند رتاج تنصحها على إنها تكلم واحد من أصدقائها علشان تضيع وقتها لأنها لحالها في البيت "يقال انها تخاف عليها " ورتاج من النوع الخواف وترفض بإستمرار وحنة سوزان مو طبيعيه بس رتاج صكت على هذا الموضوع وماعطتها وجه...اما الأخت سماهرغير شكل كانت تسيير على رتاج تقريبا يوميا بس في وقت متأخر الساعه١٠في الليل الأخت تقابل بعد ماتنتهي من مقابلتها تروح لرتاج تصطاد عصفورين بحجر علشان اذا طرى على اهلها يسألونها وين كانت عندها دليل وجودها عند رتاج واذا شافوها الناس من البديهي يعتقدونها رتاج!!!
أم رتاج ماكانت مرتاحه لزيارات سماهر أخر الليل وياما كلمت رتاج في هذا الموضوع بس رتاج كانت دايم تقول انها بنت عمها وماهي غريبه!! "مسكينه يارتاج كانت حاطه في بالها محبه فيها"
ندخل الى عالم رتاج في المدرسه وصديقات طفولتها نوره وريم هم أغلى شي عندها صداقتهم قويه لدرجه ان الكل يحسدها عليهم في يوم من الأيام جت منى "وهي من بنات فصلهم وتحب نوره حب جنون وياما حاولت تفرق بينهم بس قوة علاقة نوره ورتاج وريم ماعطت منى أي فرصه وهذا الي خلا الحقد مالي قلبها وتحاول تفرق بينهم " عند رتاج وصديقاتها وقالت صدقوني ماراح يحول الحول عليكم الا وأنتم متفارقات بإذن الله ضحكو على كلمتها وطنشوهاوعصبت وكانت تفكر في شي يفرقهم هذا هو الي تبيه يصير "ومن قو علاقة رتاج وصديقاتها اذا أخطأت وحده منهم يدارون على بعض واذا قعدو مع بعض يبينون غلطت كل وحده منهم"
مرت الأيام رتاج وصلت لثالث ثانوي قررت ان هذه السنه غير لأنها سنة النسبه يعني بتشد حيلها بس وينها ووين الدراسه ووراها عقارب مثل سوزان وسماهر وانظمت لهم منى "كونوا الثلاثي قلوب متحجره همها الأول والأخير تدمير حياة رتاج"
راحت سماهر لرتاج علشان تقنعها تروح معاهم لمعلمه خصوصيه وافقت رتاج بعد ماإستأذنت من اهلها يوم جاء وقت الطلعه غيرة رايها لأن أمها طالعه وصعبه تخلي البيت فاضي طبعآ الأحوات الفاضلات سماهر ومنى طلعو من بيت رتاج مع شخص غريب وكان عيال عم رتاج قريبين من البيت ولماشافوا السيارة والسايق غريب عنهم "على فكره جسم سماهر مثل جسم رتاج"
اكتشفوا انه غريب عنهم ضربوه ونزول سماهر ومنى..
الماكره سماهر راحت بيت رتاج ودقت على السايق وأخذها وراحت من ورى البيت "كل هذا الي صار رتاج ماتدري عن شيئ وقاعده في غرفتها وقاعده على التلفزيون" عيال عمها دخلو وكملو عليها بالطق ولما جأ أبوها دق عليهم يشوفهم بأي حق يدخلون البيت لاويمدون إيدهم على بنته بس فهموه الي هم معتقدينه حاولت رتاج تفهم ابوها سؤ التفاهم بس سبحان الله الرجال دايم في وقت العصبيه مايفكر كمل على رتج بالطق برتاج ومنعها من كل شي وبهذا تدهورت علاقتها مع أبوها
والناس مايهمها إلا الظاهر لاحظوا جيت سماهر آخر الليل لبيت رتاج والموقف الأخير حطوا في بالهم أن هذه البنت رتاج..
انتشر الخبر مثل السم على قلب رتاج..."واااو خبر على الجاهز وجا عند الناس شوفوا الإشاعات صار ألي يسوا والي مايسوا يتكلم على رتاج"
غابت إسبوع من المدرسه بعد عذاب من الي صار وبعد تفكير طوييييل
قررت انها ترجع للدراسه بعد محاولت إقناع كبير لأبوها الي تغير معاها180درجه بعد الي صار كانت تفكر شنو بيصير معاها قالت في نفسها أهم شي عندي رفيقاتي وكلها كم شهر وبتخرج داومت على أمل انها بتلقى صديقاتها بس الي جرحها لقتهم بس ناظروها نظرت إحتقار وكملت مشيها وانتبهت لنظارات الكل لها نظرات إحتقار حاولت تمسك نفسها بس ماقدرت وهي تسمع الي تكلمون والي ينادون بعض والي يناغزون بغض غصب طلعت دموعها كانت تعاتب صديقاتها بينها وبين نفسها (ليش صدقتوا علي طيب اقل شي تسوونه تسألوني اناسويت كذا موتحكمون علي انالوكنت مكانكم كان سكت الكل وماأسمح لمين من كان يتكلم عليكم خسارة محبتي لكم وخسارة الأيام الله يسامحكم !ماألوم الناس إذا ابتعدوا أقرب من لي صدقو علي)....
كانت الأيام تمر على رتاج مثل السم....
في يوم من الأيام جت ام طالبه للمدرسه وكانت تسأل المعلمه عن صاحبة السالفه كانت رتاج تقرأ في المصلى وولية الأمر والمعلمه واقفات فوق راس رتاج وقالت هذه راعية السالفه كانوا يتكلمون عنها كلام وقح سمعت رتاج الكلام اخنقتها العبره بس ماتبي تضعف لهم(اقول للأم اهتمي في بيتك ابرك من مداور ورى السوالف وأقول للمعلمه هذا وانتي معلمه وفاهمه وقاريه حسافة الشهاده الي أخذتيها اجل ماألوم الجاهلات يسوون أردى من كذا)
تخرجت رتاج من المدرسه قررت تكمل دراستها وتبط عين الكل بس أخذت لهاقاعده
(مافيه صداقات بعد اليوم ومستحيل أحد يعرف الي بقلبها ) جرحهامن الصداقه كبير طبعا الانسان مهما كان بطبيعته انطوائي لابد انه يحتك في الناس تعرفوا عليها بنات حبوها بس هي معتبرتهم رفيقات تخرجت من بعدها ماعرفت شي عنها الي أعرفه انه جرحها من الصداقه ما جف دمه ......
هناك كثيرات مثل رتاج ويمكن أصعب من حالها لونأخذ بأيديهن إلى الطريق السليم لن نخسر شيئ نحن بشر ونخطيئ ولكن الخطأ ان نكرر الخطأ مره ثانيه ...
سأكتب كلمه مهما كان الأمر (يامافيه ناس يسوون الخطأ علني والمصايب ومايتجرأ إبن أمه وأبوه انه يتكلم فيهم )
انا لا أعلم عن هذه الدنيا ومفاجئاتها ولكن إذا قرأتها أهدي لها محبتي وإحترامي وأقول لها مهما كان الظلم يوجد عدل بإذن الله تعالى وأكبر دليل هي كتابتي هذه وأتمنى أن تقرأوها بتأني حتى لا تظلموها أنتم أيضآ لأن أشباهها في هذا الزمن كثيرات
قد يكون لنا مغامره جديده من مغامرات الحياه ونسعد بها وقد نحزن ولكن تأكدو بأني سأشارككم ولاتنسوني بالدعاء
أبي أرأكم بكل صراحه ؟إسمحولي إن أطلت عليكم تحياتي