فــِــي الـمـُــسـْــتـَـشـْـفـَــى ..

[BIMG]http://www.techniques-beats.co.uk/images/HOSPITAL-LOGO-FOR-TECHNIQUES-BEATS.jpg[/BIMG]



قـال إبن سينـا :

الوهـم نصف الـداء ,

و الإطمئنـان نصف الـدواء ,

و الصبـر أولى خطـوات الشفـاء .




ــــــــــــــــــــــــــــــــــــــــــــــــــ ـــــــــــــــــــــــــــــــ
هـَــمـْــــــــــــــــسْ الــــحـًـــــــــــــــــــــــــــــــرُوفْ
ــــــــــــــــــــــــــــــــــــــــــــــــــ ـــــــــــــــــــــــــــــــ




على المستوى الشخصي ..

لا أحب المستشفيات ,

و لا أذهب لها إلا مجبرا و في حالات محدوده جدا ..

إما زيارة مريض أو مرافقة مريض ,

و إما عمل أشعه أو إجراء عملية جراحية ,

من النادر أن أذهب للمستشفى لـ غير هذه الأمور ,

فـ المستشفى يصيبني بـ القشعريرة عندما أقترب منه ,

و القشعريرة تجلب لي هبوط الضغط , والذي يسبّب الإغماء و الغشيان ,

أحيانا .. و بدلا من أذهب لـ زيارة مريض أجد نفسي أنا المريض ,

و يدخلوني للملاحظه و يحطّون لي دريب " مغذي " , و هذا الأمر تكرر أكثر من مرّه !!


ليلة الإثنيـن 11 / يوليو ذهبت مجبرا للمستشفى عشان أعمل أشعه على ركبتي ,

يوم الأحد اللي قبله لعبت كرة و تعـوّرت , و مثل كل مرّه .. لا يخلو الـلعب من إصابات متفرقه ,

و لكن آلم الركبة الأخير كان فظيع و صعب إحتماله ,

ذهبت عشان أتأكد من شيء كنت خايف منه , لأن كل العوارض و الدلائل تشير إلى ما أخشاه ,

حتى إحساسي يقول لي أن هذا الألم مو ألم عادي , و هناك شيء غير جيد في إنتظاري !!

دخلت ع الدكتور و فحصني فحص نظري , وطلب مني أعمل أشعة X . Ray ,

عملتها و رجعت له , و لما شافها قالي :

" إزا عاوز تلعب كرة مرة تانيه لازم تعمل عمليه في ركبتك , و إذا مفكر تعتزل الكره فـ العملية مالهاش لزمه " !!

قلت له: يا دكتور أنا مدري إذا أنت جديد هني , أو حاطينك عشان تخرّع الناس اللي يدخلون عليك ,

بس الأشعة هاذي ما تظهر إلا الكسور , و الألم اللي عندي في الأربطة و الغضاريف مو بـ العظام ,

الإصابه هاذي جتني من قبل في ركبتي الثانيه , وعانيت معاناه كبيرة من سوء التشخيص ,

عطني " Request " عشان أسوي أشعة رنين مغناطيسي , و هالأشعة من بعد الله راح توضّح و تظهر كل شيء ,

تفلسف شويء على راسي , و دخلني في متاهات طبيـّه ما لنا فيها أي علاقه !!

وبـ الآخير قالي انا ما عندي صلاحية أعطيك الـ Request , لازم تجي الصبح عند إستشاري العظام وتكلـّمه !!

طلعت من عنده و ما أخذت منه حق أو باطل , الـلهم الضماد اللي طلب مني أحطّه على ركبتي إحتياطا من أي شيء .


يوم الثلاثاء الصبح جيت عند الإستشاري و دخلت عليه , وشرحت له الوضع و الحمدلله تفهّم وعطاني الـ Request ,

و رحت لـ قسم أشعة الرنين و أخذت موعد , و هـ الأشعه سـ توضّح كل شيء , و إن شاءالله خير .




ــــــــــــــــــــــــــــــــــــــــــــــــــ ـــــــــــــــــــــــــــــــ
هـَــمـْــــــــــــــــسْ الــــحـًـــــــــــــــــــــــــــــــرُوفْ
ــــــــــــــــــــــــــــــــــــــــــــــــــ ـــــــــــــــــــــــــــــــ




في المستشفى ترى خليط من البشر , أغلبهم لا يعرف كل المتواجدين هناك ,

و مع هذا فـ هم ينظرون إلى بعضهم البعض , و يطيلون النظر كـ أن هناك صلات و علاقات رحم تجمعهم !!

و البعض من كثر فضاوته و " تفاهتـه " يحلو له المغازل في المستشفى و بين المرضى !!

و الأمر ليس مقتصرا ع الشباب , فـ البنات ما منهن قصور أحيانا !!

لمـّا كنت أنتظر دوري عشان أدخل ع الدكتور جوّ بعدي بنتيـن ما تركوا للمكياج مكان في وجوههن !!

اللي يشوفهن يقول هذولا مضيعين , يبون يروحون للعرس و دخلوا المستشفى بـالغلط !!

المهم في الموضوع أن هـ البنتين سببوا زحمه قدّام غرفة الدكتور من كثر ما جذبوا الإنتباه ,

اللي له شغل و اللي ما له شغل صار يجي و يلقي نظره عليهن ,

رحت قسم الأشعه و كان فاضي , ما فيه إلا أنا , و حرمه مع ولدها , وشايب مع بنته ,

ما مرّت دقيقتين إلا و القسم صار زحمه , و السبب جيش عرمرم اللي يلحق البنتين !!

خلصّت أشعة و رجعت للدكتور , شويء و إلا الزحمه جايه وراي ,

الزحمه الأخيره كانت عند غرفة الضماد , لأن الدكتور قالي لازم تحطّ ضماد على ركبتك لمدة 10 أيام ,

تأخر الممرّض , و إنتظرته , و إلا يجون وراي البنتين بعد ما طلعوا من الدكتور و معاهم كل الزحمه ,

وتقرّب مني وحده و تستأذن عشان يدخلون قبلي , قالت لي حنّا متأخرين ع العرس ممكن ندخل قبلك ؟

سمحت لهم و دخلوا , و بعد ما طلعوا كانت وحده منهن لافه إصبع يدها الصغير ,

دخلت على الممرّض و ضمّد لي ركبتي , و قالي شفت البنت اللي دخلت قبلك .. قلت له : شفيهـا ؟

قالي : إظفرها مكسور و جايه تعمل أشعه على إصبعها , صارلي 15 سنه ممرض كسور ما مرّت عليّ مثل هـ الحاله !!

قلت له :

هاذي الحياه , و اللي يعيش يا ما يشوف , أهم شيء دير بالك ع المرضى , لا تصير مثل دكتور الرعب اللي حاطينه لنا .


كونـوا بخيــــر ..