|
هنا توقّف القطار بـ ( طالب سعودي طموح ) .....
بسم الله الرحمن الرحيم
أخواني أخواتي الكرام ...
السلام عليكم ورحمة الله وبركاته وبعد
أقدم لكم قصة حياتي بعد التخرّج من كلية العلوم الصحية بالدمّــام وأتمنى أن تستفيدو وأن تساعدوني بما تستطيعون به .
تخرجت من الثانوية العامه في تاريخ 18 / 5 / 1427 ه بنسبة 94.58 % وإختبار قدرات بنسبة 79 % وتحصيلي بنسبة 76 % . تم قبولي في كلية العلوم الصحيه ولله الحمد . ( دراسه لمدة 3.5 سنوات) .... بعد عناء طويل تخرجت بمعدل 4.20 تخصص أشعه . في تاريخ 19 /2/1430 ه . اجتزت اختبار الهيئة السعودية للتخصصات الصحية بمعدل 59 % .
و من هنا بدأت معاناتي ..... 
قمت بمراجعة وزارة التعلم العالي بعد شهر رمضان في تلك السنه لمدة 6 أشهر لغرض الحصول على بعثة لأني خريج دبلوم عالي أو قبولي على منحه داخليه . كل يوم معامله جديده تكبّدت خلال تلك الفتره عناء المشاوير اللي اقطع في المشوار الواحد مسافة 1100 كيلو من مكان سكني الاصلي . وخساره ماديه طائله وقلت لعيون الطموح عاادي نصبر و نصبر .
المهم كانت الإجابه النهائيه من الدكتور خالد العنقري عندما دخلت عليه للمره السادسه وقبل أن أبدأ بالسلام عليكم ورحمة الله قال : ( أنت ؟ وش عندك هالمره ؟ لسى ما نزل برنامج لحملة الدبلوم . وهنا كانت الصدمه . تجاهلت كلامه وابتسمت وبادلته الحديث بخطاب طويل نهايته اريد ان اكمل دراستي . قال ما فيه روح على حسابك اذا كان هذا حب للسفر للخارج . المهم قلت شكرا وطلعت من عنده .
و في اليوم التالي قصدت إمارة منطقة الرياض في موعد جلسة صاحب السمو الملكي الامير سلمان بن عبدالعزيز حفظه الله وقدمت خطاب لسموه قام بالتوقيع عليه واحالته للوزاره وكان الرد بنفس الصيغه نأسف عزيزنا الطالب . وذهبت لهيئة الديوان الملكي وقدمت معامله اخرى و قمت بمراجعتها في الرياض وتم احالتها لجده وذهب اليها هناك وكان الرد هو نفسه . وبعدها قدمت معامله لمكتب خادم الحرمين الشريفين ثم معامله لمكتب ولي عهده الامير سلطان ولم تعطي نتيجه للاسف .
بعد هذا العناء ذهبت واخذت دوره في اللغه الانجليزيه وحصلت على الشهاده في احد المعاهد بدل ما اجلس فاضي ( طبعا الوظايف كلكم تعرفون حبيبتنا وزارة الخدمه المدنيه )
المهم رحت لكلية الغد عقب ما سمعت ان فيها منح وجيتهم في سنة 1431 وقالو اسفين التسجيل مغلق تعال السنه الجايه . قلت ما عليه ( ما بنكسر صابر ) نجيكم ان شاء الله السنه الجايه . جا قبل ثلاثه اسابيع من هذا اليوم ورحت للكليه وقدمت اوراقي وقلت عادي راح اسجل على حسابي الخاص ما فيه مشكله بس اهم شي اكمل دراستي . قالوا اسمع نبشرك فيه شروط جديده . قلت وشهي بشروني . قالو عشان تكمل دراستك لازم تختبر احد هالاختبارات
اختبار توفل ورقي نسبة (000 ما ادري ناسي النسب )
أو
اختبار توفل عبر الانترنت بنسبة (000)
أو
إختبار ايلتس نبسبة (00)
أو اختبار الستيب في مكر القياس الوطني بنسبة ( 68 ) . وعقبها تعال نقبلك على طول .
المهم رحت ركض ابي اسجل في التوفل ولقيت ان مواعيد اعلان النتايج راح تتأخر كثير ويمكن يفوتني التسجيل حسب تفكيري وخوفي وقلت ما لي الا مركز قياس واختبار الكفايات
المهم سجلت وجا وقت الاختبار واختبرت و جلست انتظر النتيجه ولكن ........ جات النتيجه 58 وهم طالبين 68.
وانصدمت ورحت للكليه وقلت لهم فزعتكم قالو اطلع مع الباب بالله وش رايكم ؟ طلعت مع الباب وانا اهز راسي واضحك واقول ( ما بنكسر صاابر ) وش تنصحوني فيه ؟ يا اخواني الاعزااااء ؟
ملاحظه / اللي يحتاج اي معلومه عن الاختبارات ( خصوصا اختبار الكفايات يامرني امر وراح اعطيه مراجع وتفصيل تام ان شاء الله ) او مراجعات الوزاره تراني صرت خبره
بس تكفون دعواتكم ونصايحكم لا تنسوووني يالغالين .
أخوكم / فني أشعة
التعديل الأخير تم بواسطة فني أشعة ; 2011- 7- 14 الساعة 07:41 AM
|