|
شاركنا برأيك .... (هنا) عجبني وما عجبني
مرااااااااااااااحب
بااااااك ياحلوين ،،،
شفت الوضع هادئ هنا فحبيت ادخل وأسوي اكشن
موضوعي اعتبروه موضوع فضفضة او حكاوي وبس او رسالة الى الوالي (الادارة)
لحد يتشنج منه ولحد يحمله اكثر من ما يحتمل
المهم اننا نستفيد منه ،،،،، اتفقنا يا حلوووووووين.gif "(204)")
استهلال:
ومـا انتفـاعُ أخـي الدنيـا بِناظِـرِهِ ... إذا استـَوَتْ عِندَهُ الأنـوارُ والظُّـلُـمُ
ملتقانا الحبيب واعضاءنا الاكثر حباً،،،،
من خلال كل عضو ومشاهدته ومتابعته يتكون لديه شي أو أشياء تعجبه وعكس ذلك.
وبصراحة
طبعاً اعجبني الكثير والمميزات اكثر من العيوب لكن ابي ابحط فوكس على العيوب وهي اقل من المميزات لكن العيوب تذكرعشان نتلافاها في قادم الايام والملتقى كله اعجبني ولكن ابرزها
أعجبني:
• فكرة الملتقى.
• المناصحة منتشرة جداً بين الاعضاء.
• روح التعاون بين الاعضاء وحرصهم على مصلحة بعض لدرجة انك تحس بان بعض الاعضاء كانه ا خ او اخت لك.
• تنوع الافكار المطروحة ( البعض يكتب مقترحات وبعضهم يكتب تجارب شخصية في طرق المذاكرة).
• روح المبادرة عند كثير من الاعضاء( اخبار جديدة وكتابة معلومات تكون غايبة عن البعض وسرعة الرد على بعض الاستفسارات).
• فعلا البعض بذل جهد خرافي وتكلف مش من اجل شي الا عشان يساعدنا ويسعدنا.
• لما يجي احد ويكتب سؤال فاهي حيل (وانا واحد منهم) تلقى كم عضو يردون عليه ويحصلون له كم حل يمكن لو مكان ثاني كان طنشوة.
ما عجبني:
• في مواضيع حل الواجبات يجي البعض ويخمن كم حل ويكتبها في موضوع ولا يبين انها تخمينات ويجي واحد مطسس ويلطشها ويطلع الحل غلط ( مفروض يكتب بشكل واضح في العنوان انها توقعات مش يكتب حل الواجب .... لمادة ..... )
• نفس الحكاية البعض يحل صح ويجي يكتب يحط السؤال كذا إجابته الخيار رقم كذا، طيب الجامعة تغير مواقع الاجابات ومواقع الاسئلة ، كمل جميلك واكتب الاسئلة والجواب بشكل واضح.
• في فترة الاختبارات ثبت لنا وبالدليل القاطع ان كثرة فتح المواضيع امر مزعج جدااااااااااااااا وجابت لنا الفوضى ومن يقول غير كذا اقوله كيف الحال؟
• بعض الاخوان ماقصر دايم يحطون لنا ملخصات وبعض اوراق العمل لبعض المواد ، لكن في لليله الاختبار!لو نزلوها قبل الامتحان بساعة يمكن احسن؟؟؟؟
• احياناً الملخص نفسه ينزل في كذا موضوع؟؟؟؟
• اسئلة العام الماضي تطلع فيها أجوبة غلط مع العلم ان أسئلة العام في وادي وأسئلة السنة هذي في الوادي المتصدع.
• احياناً يكتب احد موضوع تلقى له مؤيدين واكيد معارضين لكن مشكلة البعض هنا ما يفرق بين المعارضة الفكرية وبين شخصنة المواضيع.
• ما هو ادهى وامر ان لما يجي عضو ويكتب رد يتهجم فيه على الكاتب بشكل شخصي ( انتقاد في ذات الكاتب او خلفيته الثقافية وأحياناً في اعضاء جسمه وليس في موضوع المقال )، وترد عليه بإدب ولكن بشكل يزعجه ،،،، يرجع ويصيح ويقول : انت ما تحب الانتقاد وانت من نوعية ان لم تكن معي فانت ضدي وانت ماعندك ثقافة حوار او بعير ويمكن يقول انت ما تعرف ترقص ديسكو ( مسوي يعرف يصف حكي ).
• الاحظ وبكثرة ظاهرة وهي يجي واحد ويكتب موضوع فيه كم سؤال فاهي ......... وبعد ما يجون اهل الفزعة ويجاوبون عليها يغيب ويغيب ويغيب كم ساعة او يوم وبعدها يجي ويفتح موضوع جديد بنفس الاسئلة الفاهية ( مافيه ايقونة مشاركاتي تشوف فيها مواضيعك) بصراحة مدري هي عباطة او قل احترام لبقية الاعضاء او ترفع عن الشكراو ؟؟
• البعض يكتب الموضوع ولا يتابع ردود بقية الاعضاء.
• احياناً يجي احد ويكتب موضوع ويتعب فيه ويجي هنا كم عضو ويحولون المتصفح الى شاتنق روم وفي مواضيع مالها علاقة بصلب الموضوع.
• وسيلة التقييم حلوه لكن لاحظت ان الجبناء ( مش لانهم ياكلون جبن كثير لكن لانهم يخافون يواجهون ) يستغلونها في التهجم على الآخرين فليش ما يطلع اسم المقيم بشكل آلي.
• هنا فيه حركة حلوه قيمني واقيمك!!!!!!
• ما احب التطرق للمشرفين ( مدحاً او قدحاً) لكني مضطر هنا لأنهم جزء من الملتقى ( وتركيزي هنا على مشرفين قسم إدارة الاعمال ):
• بصراحة غالبية المشرفين في ملتقى إدارة الاعمال خذلونا في اهم فترة وهي فترة الاختبارات كنا نعول عليهم اشياء كثيرة( يمكن نعذرهم في انهم طلاب زينا واكيد الاختبارات مسوية لهم قلق )لكن هم حملوا مسؤولية الاشراف وقبلوها بكل شجاعة أدبية يفترض يكملون جميلهم معنا.
تغريد خارج الموضوع:
• يمكن نصنف المشرفين الى ( مشرف تقليدي او كلاسيك) والصنف الثاني ( مشرف إبداعي ) .
• الاخ ( لاكوست ) كان مشرف إبداعي وبدرجة كبيرة فله كل الشكر على جهوده ولا انسى الاخت ( دفى مشاعر ) كان لها مساهمة ابداعية جيدة تشكر عليها وخاصة في اختبار القانون ،،، مع توجيه الشكر والتحية لجميع المشرفين.
نطة كنغر ( خارج الموضوع):
شباب اليابان وصلوا فاينل العالم للشباب قبل كم سنة ومنتخب اليابان سيدات وصل فاينل المونديال الحريمي "أمس" وحنا رجال منتخبنا الى الآن محتاسين وبطلوع الروح فازوا على النشامى في بطولة ودية ،،، شفتوا ان الناس تشتغل وتطور وحنا آآآآآآآعددددددين ونتفررررررققققق " مش بالكورة لكن بحاجات كثيرة ".
خاتمة:
أكيد الملاحظات يتفق عليها البعض ويرفضها او يختلف معها البعض لكن هي عبارة عن قراءة شخصية وممكن يكون فيه اضافات منكم ما استغني عنها وممكن في اشياء غايبة عن نظري صورت لي الجميل قبيح او قبحت ما كان بالفعل جميلاً ،،، الى ان توضحونها لي تقبلوا مني احلى تحية.
بانتظاركم،،،،، وسلاااااااام مؤقت
|