وين انت مبطي عنك يا قرة العين=ياويّ يا وقتٍ مضى معك ياويّ
المشكله ماهيب وينك وانا وين=المشكله في ردّت يدينك إيديّ
كتبت فيك امن القصايد لهالحين=خمسين فارع كلها مستوى ذيّ
معقول ما غنّو عليك المغنّين=منها ولا جاك الخبر بأنها ليّ
ما شفت منك الا الغرابيل والبين=مع كل هذا إمحبتك ..مثل ماهيّ
يا غايتي عطيتك امن الهوى لين=مليت قلبك حب وتشوفه شويّ ؟
ارخصت لك قلب وعروق وشرايين=لكن خذاك الكبر والطيش والغيّ
كنت احسبنّا غير .. بالشين والزين=ونعشق بعض مادمت عايش وانا حيّ
سبحان من تقلب يديه الموازين=اللي يبدّل عتمة الليل بالضيّ
اسخف موادع في سجل المحبّين=حطوه بإسمي والسبب فعلتك فيّ
نبني محبتنا لنا شهور وسنين=وننهي محبتنا بتامر على شيّ ؟