نويت انا الصد والهجران
والبعد عنك منى عيني
سنين وانا معك بلشان
ومربطه فيك رجليني
مانيب رابح ولا خسران
لكنها ضاعت سنيني
قوبلت بالجحد والنكران
وانا العطا من عطا يديني
اسقيك ضامي واناعطشان
واضمى ولا ماك تسقيني
صارت حياتي بلا عنوان
ولاشفت واحد يعزيني
ان صحت قالو هذه طربان
يلعب طواريق وهجيني
واناالذي داخلي احزان
والها سنينٍ تخاويني
الحين لو قلت ياما كان
قصة وصارت تسليني
لكن ابا الحق على الركبان
واقول ياحض يمديني
غصبن على الراضي الزعلان
الناس وش دخلها فيني
لوكان يزعل علي افلان
رضاك يانفس يكفيني