سرح بي هاجسي وافلت زمام الوقت بدروبه
واخذت افكر بمسعاي روحاتي وجياتي
لقيت مفارق الدنيا رحل ماحاش مطلوبه
وانا حسب أني بركضي ابقضي كل حاجاتي
وقلت ابدى بامر نفسي أحاسبها ولو نوبه
عساي افلح عقب مافقت اصحح بعض غلطاتي
وانا ما افرق مثل غيري بشر غرقان بذنوبه
ولا فكرت في بكره تسيرني ملذاتي
يضيق الصدر لامني ذكرت الحشر وكروبه
وتظهر لي على شاشة خيالي كل سياتي
وافكر يوم بعث الناس والنيران مشبوبه
عسى ربي يهون لي هذاك اليوم وقفاتي
ياويلي كان ابا احاسب على كل ذنب بعقوبه
وانا للي بالدقيقة ما اقدر احصي كم زلاتي
الا يالله سهل لي طريق الخير واسلوبه
لجل ودي من الخشيه تفيض بصدق دمعاتي
وانا طالبك تسمح لي وتقبل مني التوبه
طمعت برحمتك وارجيك تقبلني بعلاتي