العيد باكر قلت انا العيد مابيه
العيد مو للي مفارق زمانه
تكفون حالي لاتقولون وشفيه
حالي عليله وسبته من زمانه
راح الذي بالحيل ياناس مغليه
اللي قصيدي وكل ما املك عشانه
اللي لي من ضاق صدري الاقيه
الله ما اروع طيبته مع حنانه
الله لي من قال ياشعيل وشفيه
حبيت اسمي يوم قاله لسانه
كنا انتزاعل ونتخاصم واخليه
واليا افترقنا مايطول جفانا
يومين والثالث يجيني واراضيه
الله يامحلى خصامنه مع رضانه
راح بنصيبه وياعسى الله يهنيه
عسى السعاده ماتفارق كيانه
اضحك على نفسي اذا قلت ناسيه
وشلون ابنسى وسط قلبي مكانه
وشلون واشعاري تغنت تناديه
عشمتني وهمس القوافي عشانه