[color="rgb(139, 0, 0)"]ساد[/color]
شاكر لك هالاستاضافه الكريمة وهالمقدمه الأجمل واللي احرجتم تواضعنا فيها وماقول الا ربي يعافيك ويقويك
على هالجهد المبذول والغير عادي منك ومن الاخت الكريمه شرقاويه اللي تعملون ليل نهار بخدمه الاعضاء ولظهور
المنتدى با احلى صوره وموفقين بأذن الله دائماً.
*
السـؤال الأول /
خ
كل عام وأنت بخير بـمناسبة الشهر الفضيل ..
تهنئة خاصه لمن تـُقدمهـا ؟؟
وانت بالف خير وينعاد علينا وعليك اخوي ساد
تهنئه من القلب للوالده اللي كبرت وصحتها ماهي مثل اول وادعي ربي من كل قلبي انه يلبسها ثوب العافيه
ويعطيها الصحه هي بركة البيت ولامّه شملنا بعد وفاه الوالد رحمة الله عليه .
السـؤال الثانـي/
كيف يكون برنامجك في شهر رمضـان المبـارك ؟؟
رمضان شهر الخير وفيه يتغير الروتين العام عن باقي السنه كلها طبعا أنام بعد صلاة الفجر دائماً واصحى الساعه ٩ للدوام وارجع من الدوام على ٥ وقبل الفطور اغلب وقتي بالمطبخ اشوف الوالدة والبنات الله يعطيهم العافيه وهم يدّهرون الين الفطور وبعدها بالمجلس على التي في لما ينتهي طاش وبعدها صلاة العشا والتراويح وارجع البيت وشاي وقهوة وخرابيط الفطور اللي مانقربها الا هالوقت وبعدها مسايير للقرايب والشباب الين الساعه ١ وبعدها البيت والعب مع عيالي ال٢ الله يخليها لي الين الفجر وبعدها صلاة ورقاد على هالمنوال هذا بالنسبه للأيام العاديه اما غيرها يختلف اختلاف بسيط.
السـؤال الثالث/
ما هي أبرز العادات التي تحرص عليها خلال شهر رمضان المبارك ؟؟
قراءه القران اهم شي وصلة الرحم هم الاشياء اللي افتقدها كثير للأسف مع زحمة الحياه والعمل وفي كثير غيرها بس هالاشياء هي اللي احسّها الابرز.
السـؤال الرابع /
كيف تـُنسّق بين أمورك الخاصه و متابعة الملتقى خلال أيام الشهر الفضيل ؟؟
أنا جديد على هالمنتدى واول رمضان يمر وانا مسجل فيه بس حسيت أني عضو من زمان عرفت الكثير من المبدعين فيه رغم ابتعادي عن الكتابه وقت بس من جد ماقدر أغيب يوم عنه لو ادخل وشوف الجديد لو ما فيني رغبه للكتابه يعني لا لقيت نفسي فاضي دخلت والله يخلي الاي فون من قريب لا افتح لاب ولا غيره.
السـؤال الخـامس /
مشروبك المفضل & أكلتك المفضلة في شهر رمضان ؟؟
وما أكثر شيء تحرص على تواجده على سفرة الإفطار ؟؟؟
مشروب الشعب على قولة اختي المها النمليت على قولة الوالده ( الفيمتو ) اهم شي بعد الفطور
وبالنسبه للاكله الثريد إدمان مابعده إدمان هههههههههه وأصابع الزمن مدري لها اسم بس اعرفها بهالاسم على ما أظن قطايف بس اهم شي لازم يكون موجود شوربه كويكر والثريد ماقدر اكل غيرها اما الخرابيط الباقية بعد التراويح أتفرغ لهم.
السـؤال السادس /
موقف طريف وآخر محرج حدثا لك خلال شهر رمضـان ؟؟ (الإجابة إجباريه)
بالنسبه للموقف الطريف وانا جاي من العمل وقفت عند اللي يبيعون رطب بالشارع وسألته هذا الرطب كويس ويقول بابا هزا زديد اليوم أنا شيل طبعا هندي هههههههه وانا اللي أخذ رطبه وأكلها وأقول أممممممم كويس كم فلوس ويقولي بابا مافي صوم أنتا وكنه صافقني هههههههه وأقول بنفسي زين اللي قالي والا مواصل بس ماحد شافني نسيت نفسي هههههههههه
احس هالموقف كان طريف ومحرج بنفس الوقت ولا في بالي شي ثاني.
السـؤال السابع /
كيف هي أجواء رمضان في المدينة التي تسكنهـا ؟
وما هي أبرز الأكلات المشهورة والعادات والتقاليد خلال هذا الشهر المبـارك ؟؟!
طبعا أنا في الشرقية واجوائها طبيعيه ديره وحده وربع كل البيوت اللي حولك بني عمك واقرباء يعني كل اللي ماتشوفهم طول السنه تشوقهم هالشهر من بركات هالشهر انه تتواصل مع الجميع وهذا شي فاقدينه طول العام.
اما الأكلات مافيه غير الثريد هي الوجبه المهمه عند الجميع اما العادات في نص رمضان تشوف البزارين يقرقعون وتتذكر ايامنا وكيف
كنا مبسوطين واحنا ندور بالحاره يعني شي حلووو مررره اتمنئ انها ماتقطع في فرحه غير طبيعيه.
السـؤال الثامـن /
بـالنسبة لك .. ما هي المتغيرات التي طرأت على رمضان قديما وحاليا ؟؟
رمضان ماتغير هو هو إحنا اللي تغيرنا اول لا مسؤليه ولا حاجه دوجه بدوجه بالسياكل ولا نحاتي شي ابد الحين اللي افضل اننا صرت اهتم في العبادات عسى ربي يتقبل منا ومنكم صالح الاعمال وكانت اول المسلسلات ذربه لافيها قلة أدب مثل الحين واللي يستحي الواحد يتابعها مثل المسلسلات الكويتيه واللي تسعى لتدمير مجتمعاتنا الله لا يوفقهم شي يحرق القلب هذا الشي اللي يقهرني.
السـؤال التاسع /
كلمة أخيرة تحبّ إضافتها ..
اشكرك اخوي ساد من كل قلبي انت والاخت شرقاويه على عملكم المميزة وشهاده حق تستحقونها
الله يعافيكم
احب أهني اعضاء الملتقى جمعيا واللي تشرفت ان اكون من بين هالكوكبه.
تحياتي واتمنى اكون خفيف على قلوبكم ووفقت في اجاباتي رغم أني اكتب وانا من جهاز الاي فون
واعذروني من الاخطاء الاملائيه ان وجدت.
ودّي