تنشد عن احوالي وانا انشدك بالله
وشلون ينشد قاتل عن قتيله!!
تمشي بجنازة من قتلته وتنعاه
يا قوّ باسك ما تحسّ الفشيله!!
اللي انطعن من صاحبه كيف ينساه
وعنده جروح القلب اكبر دليله
من باعنا بالرخص بالرخص بعناه
ومن دوّر البدلا لقينا بديله
ماني من اللي في غرامك تسلاّه
حبٍ جمعنا كان زيف وحيله
آن الأوان انهيه وامسح لذكراه
وارتاح من هم بقلبي يشيله
ويا قلب لا تحزن على مرّ فرقاه
خلك بعيد ولا تجي في سبيله
انسه ولا تفكّر ولا بيوم تلقاه
مهما يحاول لا تفكّر تجي له
لا من صحى في يوم من بعد ما تاه
يدفع ثمن غلطته ويذوق ويله
ياما بذلت الجهد تبحث عن رضاه
لكن تغيّر بين يومٍ وليله
اهواه من لا ارقاه واقفى وخلاه
ولمّن توهق جاك يرجي الدليله
مالك بحبٍ غيّر الوقت مبداه
وصار يتباهى بالمبادي الدخيله
خله على فاله ترى الوقت ياطاه
لا خير في خلٍ تناسى خليله