يا رب هذي الأرض لله والاّ..
للّي بقلبه حقد وايديه قوّه

يا رب ناس القدس مقتوله الاّ..
اللي نساه الموت عايش مشوّه

يا رب ذا مسرى النبي والمصلّى
تدنست أرضه وعرضه وجوّه

واحنا على ما تشوف.. ناس ٍ تخلّى
وناس ٍ على صدور المنابر تفوّه

اللي سلا واللي بهمه تسلّى
واللي بعَد ما حسّ بالجرح توّه

المسأله ما هي (مطوّع) و (مُلاّ )
انته نصير الحق والاّ عدوّه

مهما دعى المسلم وكبّر وصلّى
ما ينفعه لا مات الايمان جوّه

ابن القرود اللي جدوده تفلّى
يفني شعبنا ويتزايد نموّه

نزرع بوادر سلم وهو يتغلّى
يَتْفِل لحانا .. نرجع نقول قوّه

يلعن ابو العلقم ولو هو محلاّ
يلعن ابوه الذل باسم المخوّه

يلعن ابو سِلْم الـ (ياْليت) و(لعلّ)
اشرف لنا حزام ٍ ملغّم عبوّه

بكره يفاوضنا الين (المكلاّ)
ويفقد جبل (سلمى) بعينه علوّه

واحنا نفاوضهم (لكي لا) (لئلاّ)
نرمي حصى والبير تزداد هُوّه

يا رب ما باقي سوى انك تجلّى
وتقول قوموا حاربوا يا فتوّه

أو تنزل لنا النصر عِذْق يتدلّى
أو تمطر مْزونك علينا مروّه

يا رب كُفّ (ابناك) عنّا.. تعلّى
وَجْهِك وقَدْرِك عن دعاوي البنُوّه

استغفرك يا رب حاشاك كلا
غفرانك اللهم، عبدك متوّه

من كثر جور اللي وَلى أو تولّى
ايمان عبدك بالخطيئه تموّه

يارب نصرخ من عنا الضيم..والاّ
حنّا عبيدك ..ما تقدّرْه سوّه