فكرت بأيامي معك كيف بتكون؟
.............فرح، حزن، عشق، كره، حلم فاضي؟!
البيت عيا لا يجي معي موزون
.............والفكره أكبر من جدار افتراضي
قلت أستعين بعالم الجيم والنون
.............لو أنها فكره عليها اعتراضي
وصارت تهيّا لي خيالات وعيون
.............ومستقبل أيامي غدا شي ماضي
شفت أكبر أحلامي وشفت آخر الكون
............. وما عاد عندي حلم وأقفيت قاضي
ما دام عقلي عون والحظ فرعون
.............راضي ولو ما كان فيها تراضي
ما ودي أحكي وأنت لا تسأل شلون
.............خلك معي هادي وصدرك رياضي
شف الوتر يبكي وتناهيته لحون
.............ويفرح بحزنه ألف فاضي وفاضي
شف الشمع يحرق وناس ٍ يشوفون
.............من عادته يقبل على الموت ياضي
والليل عوّدني على قلة العون
.............فاس ٍ يكسّر ما بقى من حياضي
وغصب ٍ عن الساعه يجي الصبح بالهون
.............ويلبّس الدنيا ثياب البياضي
وتضحك له الورده وتسترجع اللون
............. وصحّت عصافير الأمل بالفياضي
وأنا هناك أنثر عن أكتافي ظنون
............. وأفتح عيوني عقب ما هي غماضي
عرفت أيامي معك كيف بتكون!
.............حلوه ومره بس أنا فيك راضي