يا عيال يا للـي تشرفـون المراقيـب
تريضوا لي واقصـروا مـن خْطاكـم
خـذو كـلام جحيـش مابـه تكاذيـب
مثـل السنـد مضمـون للـي وراكـم
ويا عيال وان صرتوا ضيوف ومعازيب
ترى الكـلام الزيـن مِلْحـت قراكـم
وترى البلاسة مـن كبـار العذاريـب
تـرى البلاسـه مـا تطـول لحاكـم
يصيـر بعيـون الرفاقـة تقـل شيـب
ليـا منَّـه اقبـل قيـل هـذا بـلاكـم
المذهب المذهب ترى المذهب الطيـب
وتـرى ردى المذهـب يبـوّر نساكـم
ياعيـال مـا سرحتكـم للمعـازيـب
ياعيـال مـا عمـر المعـزب ولاكـم
يا عيـال مـا ضربتكـم بالمشاعيـب
ولاسمعـوا الجيـران لجَّـة بكـاكـم
يامـا تسعـرت الخلايـق تقـل ذيـب
أريـد مـن صيـد البـراري غذاكـم
وياما قطعت مـن الفيـاض العباعيـب
من خوف لا يقصـر عليكـم عشاكـم
أحفيـت رجلينـي بحامـي اللواهيـب
وخليـت لحـم الريـم خالـط غداكـم
واليوم شوفـوا لحيتـي كلهـا شيـب
وشوفوا محل تخوضعي فـي ذراكـم
قمت اتوكّـا فـوق عـوج المصاليـب
وقصرت خطايه يوم طالـت خْطاكـم
ياعيـال يـا عيالـي عليكـم مطاليـب
عطوني القرضـه جـزا مـا وتاكـم
خوالكم ياعيـال هـم ماكـر الطيـب
ولـو تتبعـون الجـد ماحـدٍ شناكـم
ياعيـال ياعيـال الخنـا كلكـم عيـب
ياعيال مادري هالـردى منيـن جاكـم
ياعلكـم فـي حاميـات الاصـاويـب
ياللـي علـى الوالـد خبيـث لغاكـم
قصيتكـم واسْنَـدْت وادي سلاحـيـب
ولقيـت بالصبخـا مدافـيـق مـاكـم
ياعيـال بعتونـي بصفـر العراقيـب
ماهـي حقيقـة ســوَّد الله قـراكـم
يالله عسـى عَماركـم شمسهـا تغيـب
ويعتـم قمركـم ثـم يظلـم سمـاكـم
وعسى نساكم..لا تحمـل ولا تجيـب-
لا حْدٍ من الورعـان يمشـي وراكـم
شفت الجفا والحيف والغلب والريـب
باطلوعـكـم لابـيـض الله قـراكـم
لابد مـا هـو عـاويٍ دونـي الذيـب
بالقبـر مافْـرق طيبكـم مـن رداكـم
مانـي بفاضحكـم بوسـط الاجانيـب
باعمالكـم يـدرون كــل قْربـاكـم
لوكـان تـدرون الـردى والمعاييـب
صرتوا مع المخلـوق مثـل خْوياكم